दीर्घकालीन असर पर्ने खालका कुनै पनि निर्णय नगर्न एमालेको आग्रह

गण्डकी । गण्डकी प्रदेश सरकारलाई नेकपा (एमाले) गण्डकी प्रदेशसभा संसदीय दलले दीर्घकालीन असर गर्ने निर्णय नगर्न आग्रह गरेको छ । आइतबार बसेको दलको बैठकले सो निर्णय गरेको दलका प्रमुख सचेतक गोविन्दबहादुर नेपालीले जानकारी दिए ।

उनले सरकार अल्पमतमा परेर काम चलाउको अवस्थामा परिणत भइसकेकाले दीर्घकालीन असर पर्ने खालका कुनै पनि निर्णय नगर्न सचेत गराइएको बताए । बैठकले परिवर्तित अवस्थामा दलका तर्फबाट आवश्यक संवाद र समन्वयका लागि दलका नेता खगराज अधिकारीलाई जिम्मा दिने निर्णय गरेको छ ।

प्रमुख सचेतक नेपालीले गण्डकी प्रदेशमा नयाँ सरकार निर्माणका प्रक्रियामा सहज र स्वभाविक राजनीतिक निकासका लागि वातावरण तयार गर्न सम्बद्ध सबै पक्षलाई आह्वान गर्ने निर्णय बैठकले गरेको बताए । नेपाली कांग्रेस नेतृत्वको गण्डकी प्रदेश सरकार नेकपा (माओवादी केन्द्र)ले समर्थन फिर्ता लिएसँगै अल्पमतमा परेको छ ।