नेपाल इन्भेस्टमेन्ट मेगा बैंकको साधारणसभा

काठमाडौं । नेपाल इन्भेस्टमेन्ट मेगा बैंक लिमिटेडले आर्थिक वर्ष २०७९/८० को ३७औं वार्षिक साधारणसभा नेपाल प्रज्ञा प्रतिष्ठान भवन, कमलादीमा सफलतापूर्वक सम्पन्न गरेको छ । आर्थिक वर्ष २०७९/८० मा बैंक तीन अर्ब ७२ करोड रुपैयाँ खुद नाफा आर्जन गर्न सफल भएको छ । बैंकका अनुसार आर्थिक वर्ष २०७९/८० को मध्यतिर अर्थात् मिति २०७९ पुस २७ गतेदेखि साविक मेगा बैंक नेपाल लिमिटेडसँग मर्जरको कारणले आय/व्ययका रकम अघिल्लो वर्षसँग तुलनात्मक नरहेको उल्लेख छ ।

आर्थिक वर्ष २०७८/७९ मा साविक नेपाल इन्भेस्टमेन्ट बैंक लिमिटेड र मेगा बैंक नेपाल लिमिटेडको गरी कुल निक्षेप तीन खर्ब ४३ अर्ब रुपैयाँ रहेकोमा १६ अर्ब ९७ करोड रुपैयाँले वृद्घि भई आर्थिक वर्ष २०७९/८० को अन्त्यमा बैंकको निक्षेप तीन खर्ब ६० अर्ब रुपैयाँ पुगेको छ । त्यसैगरी आर्थिक वर्ष २०७९/८० को अन्त्यमा बैंकको कुल कर्जा तथा सापटी रकम तीन खर्ब १२ अर्ब रुपैयाँ कायम रहेको छ । अघिल्लो आर्थिक वर्षको अन्त्यमा साविक नेपाल इन्भेस्टमेन्ट बैंक लिमिटेड र मेगा बैंक नेपाल लिमिटेडको गरी कुल कर्जा तथा सापटी रकम तीन खर्ब १४ अर्ब रुपैयाँ रहेको थियो ।

विगत केही वर्ष देखि नेपाल राष्ट्र बैंकले बैंकहरूको संख्या घटाउन लिएको मर्जर नीतिलाई समर्थन गर्दै आर्थिक वर्ष २०७९/८० मा साविक नेपाल इन्भेस्टमेन्ट बैंक लिमिटेड र मेगा बैंक नेपाल लिमिटेड एक आपसमा गाभिई मिति २०७९ पुस २७ गतेबाट नेपाल इन्भेस्टमेन्ट मेगा बैंक लिमिटेडको नाममा एकीकृत कारोबार सञ्चालन गरेको थियो । मर्जरपश्चात् यस बैंकको चुक्ता पुँजी ३४ अर्ब १३ करोड रुपैयाँ र कुल सेयरधनी कोश ५५ अर्ब ६० करोड रुपैयाँ पुगेको छ । हाल बैंकले दुई सय ९६ शाखा, दुई सय ८२ एटीएम, १६ राजस्व संकलन काउन्टरसहित ६३ एक्टेन्सन काउन्टर र ४६ शाखारहित बैंकिङमापर्फत ३२ लाखभन्दा बढी ग्राहकलाई सेवा दिँदै आएको छ । गुणस्तरीय सेवा तथा सुविधा प्रदान गरेका कारण समीक्षा अवधिमा बैंकले अन्तर्राष्ट्रिय प्रकाशन युरोमनीबाट ‘बेस्ट बैंक २०२३’को उपाधि समेत प्राप्त गर्न सफल भएको छ ।

सम्माननीय सर्वाेच्च अदालतको निर्णयलार्ई अनुपालन गर्दै सञ्चालकहरूको निर्वाचन हाललाई स्थगित गरिएको छ भने साधारणसभामा प्रस्तुत भएका अन्य सम्पूर्ण एजेन्डाहरू सभाद्वारा स्वीकृत/अनुमोदन भएको बैंकले जानकारी दिएको छ ।