जिटो नेपाल र जिटो टीएनएपीटीएस जोनबीच सम्झौता

काठमाडौं । जैन इन्टरनेसनल ट्रेड अर्गनाइजेसन (जिटो) नेपालले जिटो टीएनएपीटीएस जोनसँग सम्झौता गरेको छ । जिटो टीएनएपीटीएस जोनमा भारतको हैदराबाद, कोइम्बटोर र विशाखापट्टनम च्याप्टर्स रहेका छ । ती च्याप्टर्ससँग जिटो नेपालले सिस्टर च्याप्टर सम्बन्ध स्थापना गरेको हो ।

सो सम्झौता हालै हायात रिजेन्सी, काठमाडौंमा भएको जिटो नेपाल च्याप्टरका अध्यक्ष कमलकुमार बेगानीले जानकारी दिए । जिटो विश्वभरका जैन उद्योगी, व्यवसायी र पेसेवरहरूको समुदाय हो, जसमा संयुक्त राज्य अमेरिका, युरोपेली देश, अस्ट्रेलिया र भारतलगायत २८ अन्तर्राष्ट्रिय स्थानका १५ हजार चार सय ११ सदस्यहरू आर्थिक सशक्तीकरण, ज्ञान र सेवाका उद्देश्य पूरा गर्न सक्रिय छन् । जिटो नेपालले नेपाली जैन व्यवसायी समुदायमा सिप विकास र मार्गदर्शनको लागि अवसरहरू प्रदान गर्ने गरेको छ । स्थापना भएदेखि यसले दान अभियान, रूख रोपण कार्यक्रम, व्यापार सेमिनार तथा खेलकुद आयोजना र जागरूकता कार्यक्रमको सञ्चालन गरेको छ ।

जिटो नेपाल र जिटो टीएनएपीटीएस जोनबीच भएको सम्झौता हस्ताक्षरमा भारतबाट टीएनएपीटीएस जोनका करिब दुई सय सदस्यहरूको सहभागिता रहेको थियो । यो समझदारीपत्रले दुई राष्ट्रहरूबीच विचार, ज्ञान र उत्कृष्ट व्यापार अभ्यासहरूको स्वतन्त्र प्रवाहलाई सहज बनाउने बताइएको छ । यी साझेदारीले नेटवर्किङ अवसर, सांस्कृतिक आदानप्रदान र परोपकारी कार्यहरुमा सामूहिक प्रयासलाई प्रबल बनाउने छ । यस सम्झौताको अतिरिक्त, जिटो नेपाल र यसको युथ विङले वैशाख १५ देखि वैशाख ३० सम्म सगरमाथा बेस क्याम्प ट्रेकिङको आयोजना गरेको छ । यस ट्रेकिङमा भारत, नेपाल, दुबई र थाइल्याण्डका १७ देखि ७४ वर्ष उमेर समूहका १८ सदस्यहरू सहभागी भएका छन् ।