सहकारीको ८० लाख लुटेको आरोपमा दुईजना पक्राउ

गोदार (धनुषा) । जनकपुरमा सहकारीको ८० लाख लुटेको आरोपमा प्रहरीले धनुषाका दुईजना जनक महतो र श्रवण कापरलाई आइतबार पक्राउ गरेको छ ।

जिल्ला प्रहरी कार्यालय धनुषाका प्रहरी नायव उपरीक्षक रञ्जन अवाले जनकपुरबाट पक्राउ गरिएको उनीहरुबाट लुटेकोमध्ये १४ लाख ५३ हजार बरामद गरेको बताए । गत वैशाख २४ गते जनकपुरधाम उपमहानगरपालिका–१९ थुमौनास्थित पोखरीबाट धनुषाको सबैला–१२ रघुनाथपुरस्थित शुभश्री बचत तथा ऋण सहकारीको ८० लाख लुटिएको थियो ।

सहकारीका कर्मचारी वीरेन्द्रकुमार महतोले जनकपुरको हिमालय बैंकबाट ८० लाख रकम निकालेर लग्दैगरेको अवस्थामा नम्बर प्लेट नखुलेको मोटरसाइकलमा सवार तीन जनाले रकम भएको झोला लुटेर फारार भएका थिए । जिल्ला प्रहरी कार्यालयले घटनाबारे अनुसन्धान जारी रहेको जनाएको छ ।