काठमाडौंमा कोरोना परीक्षण गर्न कडाइ, घरधनीलाई कारबाहीको चेतावनी
काठमाडौं, असार १०
सरकारले काठमाडौं उपत्यका प्रवेश गर्नेलाई कोरोना परीक्षण गर्न कडाइ गरेको छ । जेठ ३२ गतेदेखि घोषित लकडाउन सकिएपछि असार १ गतेबाट काठमाडौं उपत्यका प्रवेश गर्नेको संख्या बढेको छ । संख्या बढेसँगै कोरोना परीक्षणका लागि राष्ट्रिय जनस्वास्थ्य प्रयोगशाला टेकु जानेको भीड लागेको छ ।
काठमाडौंका कतिपय घरधनीहरुले भाडामा बस्नेहरुलाई कोरोना परीक्षणको रिपोर्ट नलिई बस्न नदिने भनेपछि कतिपय गाउँमा रोकिएका छन् भने काठमाडौं प्रवेश गरेकाहरु टेकुमा परीक्षणका लागि धाउन थालेका छन् । टेकुमा परीक्षण गर्न जानेको भीड बढेपछि स्वास्थ्य तथा जनसंख्या मन्त्रालयले उपत्यका प्रवेश गर्नेहरुले अनिवार्य रुपमा १४ दिन होम क्वारेन्टाइनमा बस्नुपर्ने र त्यसरी बस्दा लक्षण देखिए मात्र परीक्षण गर्ने जनाएको छ ।
अहिले लक्षण नदेखिए पनि कोरोना परीक्षणको लहर चलेको छ । त्यही भएर टेकुमा परीक्षण गर्नेको लाइन दिनहुँ बढ्दो छ । चाप बढेपछि स्वास्थ्य तथा जनसंख्या मन्त्रालयले क्वारेन्टाइनमा बसेपछि मात्र परीक्षण गर्ने व्यवस्था गरी त्यसलाई कडाइका साथ पालना गराउन गृह मन्त्रालयलाई भनेको छ ।
स्वास्थ्य मन्त्रालयको पत्रअनुसार गृहले काठमाडौं उपत्यकाका तीनवटै जिल्ला प्रशासन कार्यालयलाई उक्त व्यवस्था लागू गराउन निर्देशन दिएको गृहका एक अधिकारीले जानकारी दिए । काठमाडौं बाहिरबाट आउनेहरु अब १४ दिन आफ्नै घर तथा कोठामा बस्नुपर्ने छ । त्यसपछि लक्षण देखिए मात्र परीक्षणका लागि सम्पर्कमा जानुपर्नेछ ।
काठमाडौंका घरधनीहरुले कोरोना परीक्षण गर्न कोठामा बसेकाहरुलाई दबाब दिएपछि स्वास्थ्य मन्त्रालयले त्यस्तो दबाब नदिन आग्रह गरेको छ । मंगलबार आयोजित नियमित पत्रकार सम्मेलनमा स्वास्थ्य मन्त्रालयका प्रवक्ता प्राडा जागेश्वर गौतमले घरधनीहरुलाई दबाब नदिने आग्रह गर्दैै दबाब दिएमा कानुनी कारबाही गर्ने चेतावनी दिएका हुन् । घरधनीहरुले बस्न नदिएमा भाडामा बस्नेहरुले स्थानीय प्रहरी प्रशासनलाई खबर गरेमा प्रहरीले घरधनीलाई पक्राउ गरी कारबाही गर्नुपर्नेछ । गृहले पनि दबाब दिने घरधनीलाई कारबाही गर्न प्रहरी प्रशासनलाई निर्देशन दिइसकेको छ ।
नेपालमा कोरोना संक्रमित दश हजार नाघ्यो: नेपालमा कोरोना संक्रमितको संख्या दश हजार नाघेको छ । स्वास्थ्य तथा जनसंख्या मन्त्रालयका अनुसार मंगलबार थप एकको मृत्यु र थप ५ सय ३८ सङ्क्रमित फेला परेका छन् । दैलेख दुल्ल नगरपालिका–३ घर भएका ४५ वर्षीय पुरुषको कोभिड–१९ को कारण मृत्यु भएको हो । मन्त्रालयका प्रवक्ता डा. जागेश्वर गौतमका अनुसार ती व्यक्तिको सुर्खेतस्थित प्रादेशिक अस्पतालको आइसोलेसनमा उपचारको क्रममा असार ८ गते मृत्यु भएको हो । उनी क्षयरोग र दमका बिरामी रहेका थिए ।
दैलेखको दुल्लु अस्पतलामा उपचार नभएपछि यही असार ३ गते प्रादेशिक अस्पतालमा थप उपचारका लागि पठाइएको थियो । मृतक व्यक्तिको यही असार ३ गते स्वाब सङ्कलन गरी परीक्षण गर्दा सङ्क्रमण देखिएको थियो । उनीसँगै अहिलेसम्म नेपालमा मृत्यु हुनेको सङ्ख्या २४ पुगेको छ ।
पत्रकारसम्मेलनमा दिइएको जानकारीअनुसार विभिन्न प्रयोगशालामा गरिएको परीक्षणमा ४ सय ४८ पुरुष र महिला ९० जनामा सङ्क्रमण देखिएका छ । सोमबार ५ सय ३५ जनामा सङ्क्रमण देखिएको थियो । थपिएका नयाँ सङ्क्रमितसँगै सङ्क्रमितको सङ्ख्या १० हजार ९९ पुगेको छ । तीमध्ये महिला ९ सय ८४ र पुरुष नौ हजार १ सय १५ जना रहेका छन् ।
प्रवक्ता डा. गौतमले विभिन्न अस्पतालबाट ७६ जनालाई घर पठाइएको जानकारी दिए । आठ महिला र ६८ पुरुष मंगलबार डिस्चार्ज भएका हुन् । डिस्चार्ज हुनेसँगै डिस्चार्जको सङ्ख्या दुई हजार १ सय २४ जना रहेका छन् । तीमध्ये दुई हजार ३५ पुरुष र १ सय ८९ जना महिला रहेका छन् । डिस्चार्ज हुनेमा गोठगाउँ आइसोलेसन झापा एक पुरुष, कोशी अस्पतालबाट झापाका एक महिला र तीन पुरुष, बीपी कोइराला स्वास्थ्य विज्ञान प्रतिष्ठानबाट झापाका एक पुरुष, उदयपुरका एक महिला र तीन पुरुष, मोरङका १४ पुरुष रहेका छन् । यस्तै रामेछाप अस्पताल रामेछापबाट १३ पुरुष, साइकृष्ण आइसोलेसनबाट सप्तरीका दुई महिला र तीन पुरुष, गण्डकी अस्पतालबाट पर्साका दुई महिला र नौ पुरुष, कोभिड–१९ अस्पताल बलम्बुबाट नवलपरासीका एक महिला पनि डिस्चार्ज भई घर फर्किएका छन् ।
यसैगरी बेनी अस्पताल म्याग्दीका दुई पुरुष र धौलागिरि अस्पतालबाट बाग्लुङका तीन पुरुष, स्याङ्जा अस्पतालबाट तीन पुरुष, गोरखा अस्पतालबाट सात पुरुष, जीपी कोइराला शुक्लागण्डकीबाट दुई पुरुष पनि डिस्चार्ज भई घर फर्किएका छन् । यसैगरी ह्याम्स अस्पताल काठमाडौँबाट कास्कीका एक पुरुष, कालिका अस्पताल भिरकोटबाट स्याङ्जाका एक पुरुष, पाटन स्वास्थ्य विज्ञान प्रतिष्ठानबाट लमजुङका एक पुरुष, पोखरा स्वास्थ्य विज्ञान प्रतिष्ठानबाट स्याङ्जाका एक महिला र कास्कीका तीन पुरुष पनि डिस्चार्ज भएका छन् ।
यसैगरी अहिलेसम्म एक लाख ८६ हजार ३ सय ६६ जनाको पीसीआर र दुई लाख ७१ हजार ५ सय ८४ जनाको आरडीटी परीक्षण गरिएको छ । विगत २४ घण्टामा चार हजार ९ सय ९५ पीसीआर र तीन हजार ४ सय ८१ आरडीटी गरिएको छ । अहिलेसम्म ८५ हजार ८ सय १३ जना क्वारेन्टाइन र सात हजार ८ सय ५१ जना आइसोलेसनमा रहेका छन् ।
क्याटेगोरी : समाचार
ताजा अपडेट
- सभापति लामिछानेविरुद्ध पक्राउ पुर्जी लिएर रास्वापा पार्टी कार्यालय पुग्यो प्रहरी
- प्रादेशिक अस्पताल जलेश्वरका चिकित्सकद्वारा हडताल
- आजदेखि मनकामना केबलकार नियमित सञ्चालनमा
- बाघको आक्रमणबाट एकजनाको मृत्यु
- पाँचपोखरी महिला ट्रेल रेसमा निर्मला प्रथम
- देशभर बालबालिकालाई भिटामिन ‘ए’ र जुकाको औषधि खुवाइँदै
- युरोपेली केन्द्रीय बैंकले फेरि ब्याजदर कटौती गर्यो
- आरबीआईद्वारा चार गैरबैंकिङ वित्त कम्पनीलाई ऋण दिन प्रतिबन्ध
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया