नौ वर्षसम्म पनि सकिएन सम्पदा बस्तीको पुनर्निर्माण !
सुबास बस्नेत २०८१, साउन ३१ १०:४७ 
दोलखा । भूकम्प गएको एक दशक पुग्न लाग्दा समेत दोलखाको भीमेश्वर नगरपालिका–२ स्थित ऐतिहासिक सहर दोलखाको सम्पदा बस्तीको पुनर्निर्माण अझै सकिएको छैन । यहाँका करिब एक चौथाइ नागरिकले अझै निजी आवास निर्माण नगरेको पाइएको हो ।
राष्ट्रिय पुनर्निर्माण प्राधिकरणले सम्पदा कार्यविधि निर्माणमा ढिलाइ गरेकाले लाभग्राही सूचीमा रहेकामध्ये यहाँका एक सयभन्दा बढीले निजी आवास निर्माण नगरेको वडाध्यक्ष स्टालिन श्रेष्ठले जानकारी दिए । उनका अनुसार सम्पदा बस्तीमा लाभग्राही पाँच सय ५९ र सबलीकरण लाभग्राही २६ गरी कुल पाँच सय ८५ लाभग्राही रहेका छन् । यीमध्ये पाँच सय २३ ले पहिलो किस्ता, चार सय ५७ ले दोस्रो र तेस्रो किस्ता लिएका छन् । पहिलो किस्ता अनुदान बुझेर पनि घर निर्माण नगर्नेको संख्या एक सय २८ रहेको बुझिएको छ । हालसम्म उक्त बस्तीमा चार सय ५७ मात्र निजी आवास निर्माण भएका छन् । यस्तै, एक सय ३४ जनाको ५४ वटा बहुस्वामित्वका निजी आवास निर्माण भएका छन् ।
पूर्णरूपमा दक्ष कामदार नभए पनि स्थानीय दक्षताअनुसार ऐतिहासिक निजी आवास निर्माण गरिएको वडाध्यक्ष श्रेष्ठले बताए । ऐतिहासिक सहर भएकाले सम्पदा बस्तीमा चार जनासम्मको बहुस्वामित्व रहेको छ । प्राधिकरणले सम्पदा बस्तीका एकल वा बहुस्वामित्वका निजी आवास पुनर्निर्माणसम्बन्धी कार्यविधि २०७६ जारी गरेपछि मात्र भवन निर्माण हुन लागेका हुन् । यो कार्यविधिमा घरहरू प्रायः प्राचीन र कलात्मक शैलीका हुनुपर्ने, भारवहन गर्न सक्ने पर्खाल, कम्तीमा दुई आना दुई पैसा बराबरको जग्गामा घर बनाइनुपर्ने, घरको अघिल्लोपट्टिको भाग चम्किलो इँटाको पर्खाल हुनुपर्ने, टुँडाल–ट्वाकल राखिनुपर्ने समेत उल्लेख रहेको छ । निर्माण भएका घरहरू राणाकालीन घरमा प्रयोग भएजस्तो चुन प्लास्टर, स्टिल वा कङक्रिटको फ्रेम संरचनाजस्ता थुप्रै सर्त पूरा नगरे अनुदान नदिने पनि कार्यविधिमा उल्लेख रहेको छ ।
स्थानीयका अनुसार सकेसम्म आफ्नो घर सम्पदामैत्री बनाउन खोजे तापनि निर्माण सामग्री, दक्ष जनशक्ति अभावका कारण प्राधिकरणको असाध्यै झन्झटिलो कार्यविधि सर्त पूरा गर्न कठिन भएको हो । ऐतिहासिक सहर दोलखा यसअघि पनि सांस्कृतिक सहरका रूपमा चिनिएको छ । यहाँको आफ्नै मौलिकताले धर्म संस्कृतिसँग खास महत्व राख्ने भएकाले यो सहरलाई पुरातत्विक महत्व झल्कने गरी विकास गर्न खोजिएको भीमेश्वर नगरपालिका नगरप्रमुख ईश्वरनारायण मानन्धले बताए । झन्झटिलो कार्यविधिले सबैले पाएसरहको अनुदान पाउन नै मुस्किल भएको वडाध्यक्ष श्रेष्ठले बताए । पुरानै महत्व झल्किने गरी भूकम्पप्रतिरोधी कलात्मक शैलीमा घर निर्माण गर्नेलाई नगरले थप ५० हजार अनुदान र सम्पदा बस्ती कार्यविधिमा प्राधिकरणले पनि थप ५० हजार अनुदान दिने उल्लेख गरिएको भए पनि कागजमै सीमित रहेको छ । वडाध्यक्ष श्रेष्ठले थप पाउने भनिएको अनुदानको आशा मरिसकेको बताए । कतिपय लाभग्राहीले बस्ती छाडेर काठमाडौंलगायतका सहरमा बसोबास गर्ने हुँदा पनि पुनर्निर्माण नभएको बताए ।
क्याटेगोरी : समाचार, बागमती प्रदेश
ट्याग : #Page 8
ताजा अपडेट
- नेपालगञ्जमा १०८ फिट अग्लो ‘हनुमान’को मूर्ति बनाइँदै
- राजस्व सङ्कलन बढ्यो
- ‘प्रादेशिक तथा स्थानीय सडक सुधार कार्यक्रम’ प्रारम्भ
- शेयर बजार राताम्मै
- भारतीय सेनाध्यक्षलाई राष्ट्रपतिद्वारा ‘मानार्थ महारथीको दर्ज्यानी चिन्ह’ प्रदान
- पूर्वाञ्चल विश्वविद्यालयले अन्तर्राष्ट्रिय सम्मेलन गर्ने
- पाथीभरा क्षेत्रमा हल्का हिमपात सुरु
- बजार माग बढेसँगै अलैँचीको मूल्य उच्च विन्दुमा
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया