नवप्रवर्तन र प्रविधिको विकास सरकारको प्राथमिकतामा

काठमाडौं । भौतिक पूर्वाधार तथा यातायातमन्त्री देवेन्द्र दाहालले नवप्रवर्तन र प्रविधिको विकास सरकारको प्राथमिकतामा रहेको बताएका छन् । इञ्जिनियरिङ अध्ययन संस्थान, पुल्चोक कलेजले विकास गरेको पेट्रोल र हाइड्रोजनबाट चल्ने गाडीको शुभारम्भ कार्यक्रममा उनले समृद्ध नेपालको लक्ष्य प्राप्त गर्न वैकल्पिक ऊर्जा, प्रविधि र अनुसन्धानलाई प्रोत्साहन गर्न सरकार तयार रहेको बताए ।

मन्त्री दाहालले प्रविधिको विकास र प्रवद्र्धनका लागि आवश्यक नीतिगत व्यवस्थाका लागि मन्त्रालय अग्रसर रहेको समेत बताए । औद्योगिक मुलुकका कारण विश्वव्यापीरूपमा बढिरहेको कार्बन उत्सर्जनको मारमा नेपालजस्ता मुलुकहरू परिरहेको उनको भनाइ थियो । यसले हिमालदेखि समुद्रसम्म प्रदूषण बढाएको उनले बताए । ‘यस्ता विश्वव्यापी चुनौतीको सामना गर्न नेपाल पनि तयार रहनुपर्छ । त्यसका लागि वातावरणमैत्री र नवीकरणीय इन्धनको प्रवद्र्धनमा जोड दिन आवश्यक छ’, उनले भने ।

कार्यक्रममा मन्त्रालयका सचिव केशवकुमार शर्माले नेपालले प्राकृतिकरूपबाट नै हाइड्रोजन प्राप्त गर्न सक्ने भएकाले औद्योगिक उत्पादन र उपयोगका लागि कानुनी व्यवस्था गर्न मन्त्रालय तयार रहेको बताए । पेट्रोल र हाइड्रोजनको प्रयोगबाट चल्ने ‘इन्जिन’ निर्माणको नेतृत्व गरेका डा प्रकाश थापाले पेट्रोलबाट चल्ने पुरानो कारको इन्जिनलाई हाइड्रोजन उपयोग गरी पेट्रोलको खपत कम गराउन पहिलो पटक नमुनाका रूपमा इन्जिन बनाइएको बताए । यस प्रविधिको विकास र विस्तार गर्न सके थोत्रा भएर थन्किएका सयौँ सवारी साधनलाई पुनः प्रयोगमा ल्याउन सकिने उनको भनाइ थियो ।

कार्यक्रममा क्याम्पस प्रमुख डा इन्द्रप्रसाद आचार्य, सहायक डिन चिन्तामणि पोखरेललगायतले नेपाली प्राविधिक र प्रविधिलाई प्रोत्साहनको खाँचो औँल्याए । सोही कार्यक्रममा ‘कन्भर्सन’ प्रविधि उपयोग गरी इन्जिन रूपान्तरण गरिएको कारमा मन्त्री दाहाल, सांसद ठाकुर गैरे, पूर्वमन्त्री कर्णबहादुर थापा समेत सवार थिए । कार्यक्रममा नेपाल विद्युत् प्राधिकरणका कार्यकारी निर्देशक कुलमान घिसिङ, हाइड्रोजन विज्ञलगायतको सहभागिता रहेको थियो ।

तपाईको प्रतिक्रिया

Login

Label

{} [+]

Name*

Email*

Label

{} [+]

Name*

Email*

0 Comments

Oldest

Newest Most Voted

Inline Feedbacks

View all comments