फाइजरका सीईओ भन्छन् – ‘कोरोनाको खोप यही वर्षको अन्त्यसम्म आइसक्छ’

अमेरिका, भदौ ३०
कोरोनाको खोप विकास गरिरहेको अमेरिकी फाइजरका प्रमुख कार्यकारी अधिकृत (सीईओ) अल्बर्ट बौर्लाले आफ्नो कम्पनीको खोप यही वर्षको अन्त्यसम्ममा वितरण गर्ने गरी आउने बताएका छन् । फक्सबिजनेसका अनुसार यदि संघीय नियमनकारी निकायबाट अनुमति पाए अमेरिकीहरुले यही सन् २०२० मै खोप लगाउन पाउने बताएका हुन् ।

‘म एफडीए (खाद्य तथा औषधि प्रशासन)ले यही गर्छ त भन्दिन तर अहिलेको अवस्था हेर्दा हामी खोप ल्याउन सक्षम हुनेछौँ’, बौर्लाले सीबीएस टिभीको ‘फेस द नेसन’ कार्यक्रममा अन्तर्वार्ताको क्रममा भने, ‘हामीले यसअघि नै उत्पादन थालिसकेका छौँ, हजारौँ हजार डोज उत्पादन भइसकेको छ। हाम्रो अध्ययन र परिणाम पनि राम्रो छ भने एफडीए र सल्लाहकार समितिले पनि राम्रै प्रतिक्रिया दिइरहँदा हामी तयार भइरहेका छौँ ।’

यद्यपि बौर्लाले फाइजरको अध्ययनमा राम्रो अवसर मिलिरहेकोले आफ्नो उत्पादनले काम गर्ने नगर्ने अक्टोबरको अन्त्यसम्ममा थाहा पाइने बताए । यही आँकलनअनुसार काम भए यही वर्षको अन्त्यमै वितरणसमेत गर्न सकिने बताए । तर अन्तिम वितरणसम्मको अधिकार भने एफडीएले दिनुपर्ने हुन्छ ।

फाइजरले बायोएनटेकसँगको साझेदारीमा खोप विकास गरिरहेको छ । उसको तेस्रो चरणको परीक्षण हुँदै छ । सम्भवतः अर्को हप्ता हुने यो परीक्षणमा ३० हजार मानिस सहभागी हुनसक्नेछन् । औषधि कम्पनीले यो संख्या बढाएर ४४ हजारमा परीक्षण गर्ने तयारी गरेको छ । फाइजरले विविध उमेर र समूहका मानिससँगै १६ वर्षेदेखि विभिन्न रोगहरु एचआईभी, हेपाटाइटिस सी र बीजस्ताबाट संक्रमितहरुमा पनि परीक्षणको तयारी गरेको छ ।

‘विविधतामूलक जनसंख्यामा सम्भव भएसम्म हामी केन्द्रित हुनुपर्छ जस्तो लाग्छ तर अहिले पनि हामी त्यसलाई नै अनुशरण गरिरहेका छौँ’, उनले भने, ‘अहिले छानेकामा पनि ६० प्रतिशत ककासियन समुदायका र करिब ४० प्रतिशत अल्पसंख्यक समावेश छन् ।’ यसमा ४४ प्रतिशत ज्येष्ठ नागरिक रहेका छन् । यसमा अफ्रिकन अमेरिकन र ल्याटिनो नागरिकको संख्या बढाउनेबारे सोचिरहेको उनले बताए ।

महामारी सुरु भएयता ह्वाइटहाउसले १० अर्ब डलर अपरेसन वार्प स्पिडअन्तर्गत कोरोनाको खोप पत्ता लगाउन खर्च गरिरहेको छ । अहिले छवटा औषधि कम्पनीले अमेरिकी करदाताको पैसा लिएर खोप विकासमा लागेका छन् । फाइजर सीईओ बौर्लाले भने आफ्ना वैज्ञानिकहरुलाई कुनै पनि कर्मचारीतन्त्रबाट प्रभावित नहुने गरी र करदाताको रकमविनै खोप विकासमा लागेको बताए । फाइजरलाई राजनीतिबाट टाढै राख्ने समेत उनले दाबी गरे ।

आफ्नो खोप परीक्षणमा असफल भए पनि कम्पनीलाई कुनै वित्तीय संकट नहुने उनको दाबी छ । कम्पनीले डेढ अर्ब अमेरिकी डलर कोरोना खोप विकास कार्यक्रममा खर्च गरिरहेको छ । अमेरिकी केन्द्रीय सरकारले फाइजरसँग १० करोड डोज (मात्रा) खोप खरिद गर्न १ अर्ब ९५ करोड अमेरिकी डलरको सम्झौता गरिसकेको छ ।

उक्त सम्झौताअनुसार थप ५० करोड डोज लिन र नागरिकलाई निःशुल्क वितरण गर्न सकिनेछ । अमेरिकामा ६४ लाखमा कोरोना पुष्टि भइसकेको छ भने १ लाख ९३ हजार जनाको भाइरसको कारण मृत्यु भइसकेको छ ।