सामाजिक सुरक्षा भत्ता सहकारीमार्फत वितरण गर्ने व्यवस्था मिलाउन माग

बागलुड. ।
सरकारले जेष्ठ नागरिकलगायतलाई प्रदान गर्ने सामाजिक सुरक्षा भत्ता सहकारीमार्फत वितरण गर्ने व्यवस्था मिलाउन पश्चिमका ३ प्रदेशका सहकारीकर्मीहरूले माग गरेका छन् । राष्ट्रिय सहकारी बैंक लिमिटेडले सोमाबर आयोजना गरेको बैंकको प्रगति समिक्षा एवम् भावि कार्यदिशा : सभावना र चुनौती विषयक एकदिने अन्तरक्रिया कार्यक्रममा सहभागी प्रदेश नं. ५, कर्णाली प्रदेश र सुदुरपश्चिम प्रदेशका सहकारीकर्मीहरूले सामाजिक सुरक्षा भत्ता सहकारीमार्फत परिचालन गर्दा लक्षित वर्गमा पु-याउन सहज हुने बताए ।

संविधानले सरकार, निजी क्षेत्र र सहकारी क्षेत्र सहितको तीन खम्बे अर्थनीतिमार्फत समृद्ध मुलुक निर्माणको परिकल्पना गरे पनि व्यवहारमा सहकारी क्षेत्रलाई काम गर्ने अवसर प्राप्त नभएको भन्दै सहभागीहरूले सहकारी अभियानले सरकारसँग पहल गरेर सहकारीमार्फत सामाजिक सुरक्षा भत्ता वितरणको व्यवस्था मिलाउनु पर्ने बताए ।

सहकारीमार्फत उत्पादन, प्रशोधन र बजारीकरणका क्षेत्रमा काम गर्न विभिन्न कानुनहरूका कारण समस्या भएको भन्दै सहकारीकर्मीहरूले सहकारी ऐनअनुसार व्यवसाय गर्न सहज हुनेगरी कानुन परिमार्जनका लागि पहल गर्न सहकारी अभियानको शीर्ष नेतृत्वले ध्यान दिन आग्रह गरेका छन् । कार्यक्रममा सहभागीहरूले उठाएका सवाल तथा जिज्ञासाहरूकालाई सम्बोधन गर्दै बैंकका अध्यक्ष केबी उप्रेतीले सहकारीमार्फत उत्पादन प्रशोधन र बजारीकरणका क्षेत्रमा प्रभावकारी काम गर्नका लागि सहकारी संघसंस्थाहरूले योजना बनाएर अगाडि बढ्नुपर्ने बताए ।

सहकारी संघसंस्थाहरूको योजनामा सहकारी बैंकले सहयोग गर्ने भन्दै उनले सहकार्य गरेर अगाडि बढ्न बैंक सदैव तत्पर रहेको बताए । कार्यक्रममा जिल्लास्तरीय सहकारी संघका अध्यक्षहरू, विषयगत सहकारी संघका अध्यक्षहरू, बैंकका शाखा समन्वय उपसमितिका संयोजक तथा सदस्यहरू, प्रदेश नं. ५, कर्णाली प्रदेश र सुदुुरपश्चिम प्रदेशबाट राष्ट्रिय सहकारी महासंघ, केन्द्रीय विषयगत सहकारी संघहरूमा प्रतिनिधित्व गर्ने सहकारी अगुवाहरूको सहभागिता रहेको थियो ।