रेल्वेबाट मालसमान ढुवानी गर्न व्यापार संघको आग्रह

काठमाडौं ।
रेल्वेबाट मालसमान ढुवानी गर्न जनकपुरधाम उद्योग वाणिज्य संघले आग्रह गरेको छ । भारतको जयनगरबाट जनकपुर हुँदै तत्काल बर्दीबाससम्म रेल्वे सञ्चालनका लागि प्रक्रिया सुरु भएपछि भारतबाट जनकपुरधामसम्म मालसामान ढुवानीका लागि पहल गर्न संघले आग्रह गरेको हो ।

संघले सोमबार धनुषाका प्रमुख जिल्ला अधिकारी प्रेम प्रसाद भट्टराईमार्फत भौतिक पूर्वाधार तथा यातायात मन्त्रालयमा ज्ञापनपत्र पठाई भारतको जयनगरबाट जनकपुरधामसम्म सञ्चालन हुने रेल्वेबाट मालसमान ढुवानीका लागि भारत सरकारको अर्थ मन्त्रालयमा आवश्यक व्यवस्थाका लागि पहल गर्न माग गरिएको छ ।

जनकपुरधाम उद्योग वाणिज्य संघका अध्यक्ष ललित कुमार साह तथा महासचिव जितेन्द्र प्रसाद साहले हस्ताक्षर गरेको ज्ञापनपत्र भौतिक पूर्वाधार तथा यातायात मन्त्रालय तथा अर्थ मन्त्रालयमा पठाइएको हो । ज्ञापनपत्र बुझ्दै प्रमुख जिल्ला अधिकारी भट्टराईले यसबाट जनकपुरधामको व्यापार फस्टाउने भएकाले आफूले सम्बन्धित मन्त्रालयमा जानकारी गराउने बताए ।