एकै दिन थपिए ५७ सय ४३ कोरोना संक्रमित

काठमाडौं ।
गत चौबीस घण्टामा नयाँ कोरोना संक्रमितको संख्या पाँच हजार सात सय ४३ देखिएको छ । स्वास्थ्य तथा जनसङख्या मन्त्रालयका अनुसार बुधबार सोही अवधिमा दुई हजार ९ सय ९६ निको भएर घर फर्किएका छन् । हालसम्म निको भएर घर फर्किनेको कुल संख्या ९९ हजार ६ सय ५ पुगेको छ ।

बुधबार आयोजित नियमित प्रेस ब्रिफिङमा मन्त्रालयका प्रवक्ता प्रा डा जागेश्वर गौतमले काठमाडौँ उपत्यकामा तीन हजार १ सय ७ नयाँ संक्रमितमध्ये काठमाडौँमा दुई हजार ३ सय ९१, भक्तपुर १ सय ७३ र लतिपुरमा ५ सय ४३ रहेको जानकारी दिए । हाल क्वारेन्टाइनमा चार हजार ६५ छन् ।

गत २४ घण्टाभित्र २० हजार १ सय १८ पीसीआर परीक्षण गरिएको छ भने हालसम्म १३ लाख ३४ हजार ८९७ को पीसीआर परीक्षण गर्दा एक लाख ४४ हजार ८७२ जनामा कोरोना भाइरस संक्रमण पाइएको छ । प्रवक्ता गौतमका अनुसार हाल ४४ हजार ४७६ जनामा भाइरसको संक्रमण सक्रिय छ ।

संक्रमित शून्य भएको जिल्ला मुस्ताङ छ । त्यस्तै पछिल्लो २४ घण्टामा २६ जनाको कोरोना भाइरसका कारण मृत्यु भएको छ । योसँगै नेपालमा कोभिड–१९ को कारणले मृत्यु हुनेको संख्या ७९१ पुगेको छ । प्रवक्ता प्राडा गौतमले मन्त्रालयबाट भएका निर्णयलाई भ्रामक तरिकाले समाचार सम्प्रेषण नगर्न आग्रह गर्दै दशै पर्वका अवसरमा पनि आवश्यकता अनुसार सबै कोभिड अस्पताल खुल्ला रहने जानकारी दिए ।