कोभिड–१९ विरुद्ध नागरिक अभियानको शुभारम्भ

काठमाडौं ।
कोभिड–१९ को महामारीको प्रकोप बढिरहेकोले यसलाई न्यूनीकरण गर्नका लागि जनसमुदायमा सुरक्षाका मापदण्ड पालना गर्न प्रेरित गर्ने उद्देश्यले कोभिड–१९ विरुद्ध नागरिक अभियान सुरु गरिएको छ । अभियानको बुधबार आयोजित एक कार्यक्रमका बीच शुभारम्भ गरिएको हो । अभियानको शुभारम्भ गर्दै नागार्जुन नगरपालिका नगरप्रमुख मोहन बहादुर बस्नेतले सरकारले महामारीलाई गम्भीरतापूर्वक लिएको बताउँदै स्थानीय स्रोत साधनले भ्याएसम्म जनतालाई अधिकतम सेवा प्रवाह गर्ने प्रतिवद्धता व्यक्त गरे । राष्ट्रिय व्यावसायिक पहलका अध्यक्ष कुश कुमार जोशीले विश्वव्यापी महामारीबाट मुलुकले व्यहोरिरहेको अकल्पनीय परिस्थितिबाट निजी क्षेत्र अत्यन्त गम्भीर भएको र न्यूनीकरण र रोकथामका लागि सक्रिय भएर लागिएको बताए ।

महामारी रोकथामको लागि सबै पक्ष उत्तिकै जिम्मेवार एवं संवेदनशील भई अघि बढनुपर्नेमा जोड दिए । निर्धारित स्वास्थ्य सुरक्षाका मापदण्डलाई पूर्णपालना गरी व्यावसायिक क्रियाकलाप अगाडि बढाउन सम्पूर्ण व्यावसायिक क्षेत्रलाई आग्रह गर्दै उनले आम सर्वसाधारणलाई समेत यसको पूर्ण पालनामा ध्यान दिन जोड दिए । कार्यक्रममा पिपुल्स हेल्थ मुभमेन्ट नेपालका संयोजक प्राडा शरद वन्तले मुलुकमा थप भयावह अवस्था आउन नदिन सरोकारवाला सवैको सहयोग र सहकार्यको अपरिहार्यतामा जोड दिँदै आमनागरिक समेत सुसूचित हुन आग्रह गरे ।

त्यसैगरी नेपाल जनस्वास्थ्य संघका अध्यक्ष श्रीकृष्ण भट्टले जनसाधारणलाई कोभिड १९ रोकथामका लागि सुरक्षा मापदण्डलाई दिगो र प्रभावकारी रुपमा लागू गर्न यस किसिमको महत्वपूर्ण कार्यको थालनी गरिएको बताए । स्वास्थ्यकर्मी तथा स्वयंसेवकहरु परिचालन गरी उपत्यकाका प्रमुख व्यापारिक केन्द्रहरु तथा प्रमुख बजार र क्रमशः यातायात क्षेत्र र अन्य व्यस्त कार्यालयहरुमा चरणबद्ध रुपमा सञ्चालन गरिने यस अभियान राष्ट्रिय व्यावसायिक पहलको सहकार्यमा नेपाल जनस्वास्थ्य संघ, नेपाल चिकित्सक संघ तथा पिपुल्स हेल्थ मुभमेन्ट नेपालको समन्वयमा सञ्चालन गर्न लागिएको हो ।