क्वान्टासका प्रमुख भन्छन् – खोप लगाएको प्रमाणविना यात्रुले विमान चढ्न पाउनेछैनन्

सिड्नी ।
अन्तर्राष्ट्रिय हवाइ यात्रुले कोरोनाविरुद्धको खोप लगाएको प्रमाणविना भविष्यमा हवाइ यात्रा गर्न नपाउने एक एयरलाइन्स कम्पनीका प्रमुखले बताएका छन् । अस्ट्रेलियाको राष्ट्रिय ध्वजावाहक क्वान्टास एयरलाइन्सका प्रमुख एलन जोयसले खोप उपलब्ध भइसकेको अवस्थामा एयरलाइन्सका यात्रुले खोप लगाएको प्रमाण बुझाएपछि मात्रै यात्रा गर्न पाउने बताएका हुन् ।

‘मलाई के लाग्छ भने विश्वका अरु हवाइ सेवाप्रदायकको हकमा पनि यो सामान्य कुरा हुनेछ’, उनले भने । महामारी सुरु हुनुअघि नै अस्ट्रेलियाले अन्तर्राष्ट्रिय सीमा बन्द गरेको थियो । त्यस्तै स्वदेश फर्किनेलाई पनि क्वारेन्टाइन बस्नुपर्ने नियम लगाएको थियो । यसअघि नै अस्ट्रेलियाले लकडाउनलाई बढी ध्यान दिएको छ । साथै उसले ठूलो संख्यामा परीक्षण र कन्ट्याक्ट ट्रेसिङलाई आक्रामक रुपमा जोड दिएको छ । सोही कारण उसले संक्रमणदर शून्यमा झार्न सफल भएको एजेन्सीहरुले जनााएका छन् ।

अस्ट्रेलियाको एक टेलिभिजन कार्यक्रममा बोल्दै उनले क्वान्टासले कम्पनीको अन्तर्राष्ट्रिय यात्रुसम्बन्धी प्रावधान परिवर्तन गर्न लागेको उल्लेख गरेका हुन् । ‘हामी मानिसहरुलाई विमान चढ्नुअघि नै खोप लगाए/नलगाएको बारे सोध्नेछौँ’, उनले भने । गत अगस्टमा अस्ट्रेलियाली प्रधानमन्त्री स्कट मोरिसनले सफल खोप आए यसलाई अनिवार्य बनाउन सकिने बताएका थिए । सोही महिनामा क्वान्टासले वार्षिक २ अर्ब अस्ट्रेलियन डलर नोक्सानीको रिपोर्ट सार्वजनिक गरेको थियो ।