ड्राइभिङ पेसा छाडेर भैंसी फार्म

सुबास बस्नेत
दोलखा ।
पछिल्लो समय धेरै युवाको रोजाइ कृषि पेसा हुनेगरेको छ । कतिपय युवा विदेशबाट फर्केर स्वदेशमै कृषि व्यवसाय गर्न थालेका छन् भने केही युवा स्वदेशमै बसेर व्यावसायिक कृषिमा लगानी गर्न थालेका छन् । दोलखाको भीमेश्वर नगरपालिका पाँच मथानीका रामहरि सुवेदी गाडी चलाउने ड्राइभिङ पेसा छाडेर गाउमै भैंसीपालन गर्न थालेका छन् । सुवेदीले आफ्नै गाउँमा कृषि तथा पशुपन्छी फार्म दर्ता गरेर करिब ३५ लाख लगानी गरेर भैंसी पालन सुरु गरेका हुन् ।

सुरुमा सातवटा दुहुनो लैनो भैंसी पालेर व्यवसाय सुरु गरेका सुवेदीले बजारमा दुधको माग बढेको देखेपछि थप २२ वटा भैंसी थपेर व्यवसाय बढाउने भएका छन् । अहिले उनको गोठमा १४ वटा भैंसीका माउपाडा रहेका छन् । सातवटा भैंसीले दैनिक ५५ लिटर दुध दिने गरेको सुवेदीले जानकारी दिए । भाइ अच्युतप्रसाद सुवेदी र उनले पाट्नरमा सुरु गरेको भैंसी पालनले राम्रो आम्दानी हुने भएपछि भैंसी पालन व्यवसायलाई थप व्यवस्थित गर्न थप ३० लाख लगानी गरेर भैंसी खरिद गर्न लागेको अच्युतप्रसाद सुवेदीले बताए । बजारमा दुधदहीको माग राम्रो रहेकाले दुई दाजुभाइले सदरमुकाम चरीकोट बजारमा आफ्नै दुग्ध डेरी सञ्चालनमा ल्याउने तयारी समेत गरिरहेका छन् ।

बजारमा दुधको मूल्य प्रतिलिटर एक सय रूपैयाँ रहेको छ । साथै उनीहरूले तरकारी व्यवसाय समेत गर्दै आएका छन् । दुवै व्यवसायबाट मासिक एक लाख रूपैयाँ आम्दानी हुने गरेको उनीहरूको भनाइ छ । अहिले दैनिक ५० देखि ६० लिटर दुध चरीकोट बजारमा बिक्री हुने गरेको छ । व्यवसाय सुरु गर्न स्थानीय निकायले कुनै अनुदानको व्यवस्था नगरेको उनले बताए । भीमेश्वर नगरपालिकाबाट हालसम्म कुनै अनुदान नपाएको भए पनि स्थानीय बैंकबाट ऋण लिएर व्यवसाय सुरु गरेको सुवेदीले बताए । नगरपालिकाले कृषि क्षेत्रमा कुनै अनुदानका कार्यक्रम दिए आफ्नो व्यवसायलाई थप उत्पादनमूलक बनाएर लैजाने योजना रहेको सुवेदीले जानकारी दिए । पछिल्लो समय बजारमा सुवेदी दाजुभाइ उदाहरणीय युवा व्यवसायी बनेका छन् ।