चिनियाँ कम्पनीलाई लपेट्न छुट्टै कानुन ल्याउँदै अमेरिका

वासिड.टन ।
अमेरिकाको तल्लो सदन हाउस अफ रिप्रिजेन्टेटिभले चिनियाँ कम्पनीलाई अमेरिकी सेयरबजारबाट बाहि-याउन नयाँ कानुन पारित गरेको छ । चिनियाँ कम्पनीले अमेरिकी अडिट नियम पालना नगरे उनीहरुलाई अमेरिकी सेयर बजारमा प्रवेश नदिने नियम पारित गरिएको हो । यो कानुनअनुसार कम्पनीहरुले आफू विदेशी सरकारको स्वामित्व, नियन्त्रणमा रहे/नरहेको समेत खुलाउनुपर्नेछ । पारित भएको ‘द होल्डिंग्स फरेन कम्पनिज अकाउन्टेबल एक्ट’ अमेरिकी राष्ट्रपतिबाट प्रमाणीकरण हुन बाँकी छ ।

आफ्नो कार्यकालको अन्तिम महिनामा ट्रम्प प्रशासन रहँदा यो कानुनले चीनमाथि दबाब सिर्जना हुने बताइएको छ । त्यस्तै चीनले उइगुर मुस्लिमको श्रम शोषण गर्ने कम्पनीबाट कटन आयातमाथि पनि यो कानुनले प्रतिबन्ध लगाउने बताइएको छ । अमेरिकाले चीनविरुद्ध पछिल्ला वर्षमा विभिन्न आरोप लगाउँदै विभिन्न आर्थिक प्रतिबन्धहरु लगाउँदै आएको छ । उसले चीनलाई आफ्नो मुद्रा अवमूल्यनको खेलमा लागेको आरोप लगाएको छ । चीन र अमेरिकाबीच सन् २०१८ देखि नै व्यापारयुद्ध चलिरहेको छ । यसैबीच, चीनले पनि आफ्ना प्रविधि, सुरक्षासम्बन्धी वस्तुको निर्यात नियन्त्रण गर्न नयाँ कानुन गत मंगलबारदेखि कार्यान्वयनमा ल्याइसकेको छ । अमेरिकी कदमको प्रतिक्रियास्वरुप चीनले नयाँ कानुन ल्याएको हो ।

अमेरिकाले नयाँ कानुन ल्याए पनि तीन वर्षे अडिटको नियम पालना नगर्ने चिनियाँ कम्पनीमात्र दण्डको भागिदार हुनेछन् । अमेरिकी धितोपत्र संघले नयाँ कानुन पारित भएकोमा स्वागत गरेको छ । तर कानुनको कार्यान्वयनमा जोड दिएको छ । यो कानुन चीनबाहेकका देशको हकमा पनि लागू हुनेछ । द यूएस–चाइना इकोनोमिक एन्ड सेक्युरिटी रिभ्यु कमिसनका अनुसार अक्टोबरसम्म २ सय १७ चिनियाँ कम्पनी यूएस एक्स्चेन्जमा सूचीकृत भएका छन् । अमेरिकामा सूचीकृत अलिबाबा केएफसीको चीन व्यवसायलगायतले केही समयअघि मात्रै हङकङको दोस्रो सेयरबजार कारोबारमा प्रवेश गरेका थिए ।