नेसनल लाइफले १० प्रतिशत लाभांश दिने

काठमाडौं ।
नेशनल लाइफ इन्स्योरेन्स कम्पनीले १० दशमलव ५३ प्रतिशत लाभांश वितरण गर्ने घोषणा गरेको छ । कम्पनीले हाल कायम रहेको चुक्ता पुँजी तीन अर्ब आठ करोड २६ लाख २६ हजार पाँच सय ४८ रुपैयाँ मध्येबाट १० प्रतिशत अर्थात् ३० करोड ८२ लाख ६२ हजार छ सय ५५ रुपैयाँ बराबरको बोनस सेयर र कर प्रयोजनको लागि शून्य दशमलव ५३ प्रतिशत अर्थात् एक करोड ६२ लाख २४ हजार तीन सय ५१ रुपैयाँबराबरको नगद लाभांश वितरण गर्ने घोषणा गरेको हो ।

लाभांश वितरणका सम्बन्धमा सञ्चालक समितिको यही मंसिर १७ गते बुधबार बसेको चार सय ३८औं बैठकले लाभांश वितरण नयाँ निर्णय सार्वजनिक गरेको हो । यसअघि भने कम्पनीले १५ प्रतिशत नगद लाभांश र दुई दशमलव पाँच प्रतिशत बोनस सेयर वितरण गर्र्ने प्रस्ताव गरेको थियो । तर अब भने कम्पनीले परिमार्जित अनुपात अर्थात १० प्रतिशत बोनस सेयर र शून्य दशमलव ५३ प्रतिशत नगद लाभांश वितरण गर्ने प्रस्ताव पेस गरेको छ । संसोधित प्रस्ताव बीमा समितिको स्वीकृति एवं कम्पनीको आगामी वार्षिकसाधारण सभाबाट पारित भएपछि कार्यान्वयनमा आउने कम्पनीले जनाएको छ ।