व्यावसायिक तरकारी खेतीमा आकर्षण

दोलखा ।
दोलखाको भीमेश्वर नगरपालिका वडा नम्बर ७ का किसानहरू व्यावसायिक तरकारी खेतीमा आर्कर्षित भएका छन् । साथै उनीहरूले तरकारी खेतीबाट राम्रो आम्दानी समेत लिने गरेका छन् । भीमेश्वर नगरपालिका वडा नम्बर ७ मकैबारीका स्थानीयले वर्षौँदेखि आम्दानीको मुख्य स्रोत नै तरकारी खेतीलाई बनाउँदै आएका छन् । तरकारी उत्पादनको पकट क्षेत्रका रूपमा मानिने मकैबारीबाट वार्षिक छ करोडबराबरको तरकारी उत्पादन हुँदै आएको छ । सदरमुकाम चरीकोटदेखि करिब तीन किलोमिटरमा रहेको मकैबारीको प्राय सबै भू–भाग खेतीयोग्य रहेको छ । विशेषगरी यहाँका किसानले छोटो समयमै राम्रो आम्दानी हुने तरकारी लगाउने गरेका छन् ।

यतिबेला यहाँका खेतबारी हरियो सागपातले भरिएको छ । सिजनमा यहाँका किसानले दैनिक दुई लाखबराबरको तरकारी काठमाडौँमा पठाउँदै आएका छन् । मकैबारीमा विगत १५ वर्षदेखि तरकारी खेती गर्दै आएका पपु तामाङले १० रोपनी जमीनमा साग र काउली खेती गरेका छन् । यसबाट वार्षिक पाँचदेखि छ लाखसम्म आम्दानी हुने उनले बताए । उनले खेतबारीमा सिजनअनुसारको तरकारी लगाउने गरेका छन् । गतवर्षको भन्दा यो वर्ष उत्पादन राम्रो भएको उनले बताए ।

गतवर्ष करिब साढे चार लाख रूपैयाँको तरकारी उत्पादन गरेका तामाङ यो छ लाख रूपैयाँसम्मको तरकारी उत्पादन हुने बताउँछन् । सिँचाइको पर्याप्त सुविधा रहेको सिङ्गो गाउँका किसान अहिले दैनिक दुई सयदेखि चार सय केजी साग काठमाडौँ पठाउने गर्छन् । उपत्यकामा उत्पादन हुने तरकारीभन्दा दोलखाको तरकारीको माग बढेकोले काठमाडौँमा तरकारी खपत बढेको स्थानीय कृषक कृष्ण तामाङले बताए । उनले पनि आफ्नो १५ रोपनी जग्गामा तरकारी लगाएका छन् । उनले लगाएको तरकारी लिन व्यापारी गाडी र मान्छे लिएर गाउँमै आउने गरेका छन् ।

काठमाडौँ उपत्यकादेखि मकैबारी नजिक रहेकोले पनि तरकारी लिन बिचौलियाहरूले मरिहत्ते गर्नेगरेको उनले बताए । छ जनाको परिवार रहेको अर्जुन दाहालले पनि तरकारी खेतीबाटै आफ्नो परिवारको खर्च धानेका छन् । साथै वार्षिक तीन लाख रूपैयाँसम्म बचत गर्नेगरेको उनले बताए । मकैबारीका धेरैजसो किसानले उत्पादन गरेको तरकारी धादिङका तरकारी व्यापारी रामचन्द्र सुवेदीले खरिद गर्दै आएका छन् । भीमेश्वर नगरपालिका मकैबारीलगायतका ठाउँमा उत्पादन भएको तरकारी आफूले खरिद गरेर काठमाडौँ लगेर बिक्री गर्नेगरेको उनले बताए । किसानलाई राहत होस् भन्ने उद्देश्यले तरकारी खेतीको समय मलबीउ पनि आफैँले व्यवस्था गरिदिने गरेको पनि उनको भनाइ छ ।