सोलुखुम्बुमा किबी चिस्यान केन्द्र स्थापना

सोलुखुम्बु ।
सोलुखुम्बुमा जिल्लामा उत्पादित किबी फलले बजार नपाइरहेको समयमा नेचासल्यान गाउँपालिकाले जिल्लामै पहिलो पटक किबी भण्डारणका लागि चिस्यान केन्द्र (कोल्ड स्टोर) निर्माण गरेको छ । गाउँपालिकाका किबी कृषकहरूको समस्यालाई मध्यनजर गरी वडा नम्बर १ सल्यानमा छ टन क्षमताको कोल्ड स्टोर निर्माण गरिएको हो । किबीले बजार नपाएको समयमा भण्डारण गरी बेमौसममा कृषकहरूले राम्रो मूल्यमा बिक्री गर्न पाऊन् भन्ने उद्देश्यका साथ चिस्यान केन्द्र स्थापना गरिएको गाउँपालिका अध्यक्ष डुफकुमार बाँस्तोलाले बताए ।

आधुनिक प्रविधिको विद्युतीय कोल्ड स्टोर निर्माण गरिएकाले किसानले उत्पादन गरेको किबी खर जान नपाउने उनको भनाइ छ । कुलबोट नेपालको प्राविधिक सहयोगमा करिब सवा तीन लाखको लागतमा निर्माणसम्पन्न कोल्ड स्टोरमा पालिकाका कृषकहरूले उत्पादन गरेको किबी भण्डारणपछि गाउँपालिका अध्यक्ष डुफकुमार बास्तोलाले उद्घाटन गरेका थिए ।

उद्घाटन गर्दै अध्यक्ष बाँस्तोलाले कृषिको आधुनिकीकरणबाट मात्रै ग्रामीण समाजमा समृद्धि सम्भव भएको बताए । गाउँपालिकाले ग्रामीण क्षेत्रका कृषकलाई प्राथमिक्तामा राखेर काम गरिरहेको उनको भनाइ छ । चिस्यान केन्द्र उद्घाटन कार्यक्रममा अगुवा कृषकहरू प्रेमबहादुर राई, नानिबाबु कोइराला, सुजन राईलगायतले पालिकाले चिस्यान केन्द्र बनाएपछि उत्पादनले मूल्य पाउने भन्दै खुशी व्यक्त गरे । पहिले सिजनमा मात्र बिक्री गर्नुपर्ने भए पनि अब भने चिस्यान केन्द्रमा राखेर अन्य समयमा बिक्री गर्दा उत्पादित वस्तु खेर जान नपाउने स्थानीय किसान नानिबाबु कोइरालाको विश्वास छ ।