काठमाडौं, पुस २०
प्रधानमन्त्री केपी शर्मा ओलीको नाममा प्रधानमन्त्रीको सरकारी निवास बालुवाटारबाटै ठगी धन्दा सञ्चालन भएको देखिएको छ । स्रोतका अनुसार प्रधानमन्त्री ओलीको सल्लाहकार समूहबाट उक्त ठगी धन्दा भएको हो । सो ठगी धन्दा नेपालकै २७ वटा वाणिज्य बैंकहरुमार्फत गर्न प्रधानमन्त्री निवासबाट नेपाल राष्ट्र बैंक हुँदै नेपाल बैंकर्स एसोसिएसनमा पत्र पुगेको छ । एसोसिएसनले उक्त पत्र सबै २७ वटै वाणिज्य बैंकहरुलाई पठाएको छ । पत्र प्राप्त गरेपछि वाणिज्य बैंकका प्रमुख कार्यकारी अधिकृत (सीईओ)हरु त्रसित बनेका छन् ।
एसोसिएसनको तर्फबाट अनिल शर्माले वाणिज्य बैंकहरुलाई पत्र पठाउँदै एउटा समाचारमूलक अनलाइन सञ्चालन गर्दैै आएको ‘कथा नेपाल प्रालि’ नामको कम्पनीलाई प्रत्येक बैंकले चार लाख रुपैयाँको दरले उपलब्ध गराउन भनिएको छ । उक्त ‘कथा नेपाल प्रालि’ नामक कम्पनीले ‘देखापढी डटकम’ भन्ने अनलाइन चलाउँदै आएको छ । उक्त कम्पनीको अध्यक्ष मनोजराज पाण्डे हुन् । पाण्डे विवादास्पद छवि बनाएका प्रधानमन्त्रीका राजनीतिक सल्लाहकार विष्णु रिमालका आफन्त हुन् ।
स्रोतका अनुसार खोलौं बैंक खाता भन्ने राष्ट्रिय अभियानका लागि कथा नेपालले प्रधानमन्त्री कार्यालयमा प्रस्ताव पठाएको र सो कथा नेपालले पठाएको प्रस्तावलाई प्रधानमन्त्रीका सल्लाहकार रिमालको निर्देशनमा प्रस्तावसहित नेपाल बैंकर्स एसोसिएसनमा पठाएको थियो । बैंकर्स एसोसिएसनले आफ्नो ३३औं वार्षिक साधारणसभामा प्रधानमन्त्री कार्यालयबाट आएको पत्रको बारेमा छलफल गरेको थियो । त्यसपछि एसोसिएसनले वाणिज्य बैंकहरुलाई उक्त कथा नेपाललाई प्रारम्भिक चरणमा चार लाख रुपैयाँको दरले चेक उपलब्ध गराइदिनको लागि पत्राचार गरेको छ ।
बैंकर्स एसोसिएसनले कथा नेपाललाई संस्थागत सामाजिक उत्तरदायित्व (सीएसआर)बापतको रकम उपलब्ध गराउन भनेपछि बैंकका सीईओहरु कसरी उक्त शीर्षकको रकम उपलब्ध गराउने भन्नेबारे अन्योलमा परेका हुन् । सीएसआरको रकम वाणिज्य बैंकहरुले विद्यालयलाई ब्याग, कम्प्युटर, ल्यापटप, चिसो, हिमपात र बाढी तथा पहिरो पीडितको लागि कपडा, त्रिपाल, खाद्यान्न, वृद्धाश्रमहरुलाई भौतिक सहयोगलगायतका काममा खर्च गर्नुपर्छ । तर, बैंकर्स एसोसिएसनले सोही सीएसआर शीर्षकको रकमबाट मिलाएर कथा नेपाललाई रकम दिन भनेपछि सीईओहरु समस्यामा परेका हुन् ।
वाणिज्य बैंकहरुले आफूले आर्जन गरेको खुद नाफाको रकममध्ये एक प्रतिशत संस्थागत सामाजिक उत्तरदायित्व (सीएसआर)मा खर्च गर्नुपर्छ । नेपालमा अहिले रहेका २७ वटा वाणिज्य बैंकहरुमध्ये दुई/तीनवटाको दुई अर्ब रुपैयाँभन्दा माथि खुद नाफा भए पनि अरु बैंकहरुको डेढदेखि दुई अर्ब रुपैयाँ नाफा छ । समग्रमा वाणिज्य बैंकहरुले करिब ५० अर्ब नाफा कमाउँदै आएका छन् । सो रकमको एक प्रतिशत भनेको करिब ५० करोड रुपैयाँ सामाजिक काममा खर्च गर्नुपर्नेछ । बैंकहरुले विज्ञापन प्रकाशित गर्नका लागि उक्त शीर्षकको रकम खर्च गर्न मिल्दैन । कथा नेपाल पनि सञ्चार संस्था चलाउने कम्पनी भएको कारण उसलाई कसरी उक्त पैसा दिने भन्ने विषयमा अधिकांश बैंकका सीईओहरु समस्यामा परेका हुन् ।
केही समय अगाडिसम्म ‘जनतासँग प्रधानमन्त्री’ नामक टेलिभिजन कार्यक्रम सञ्चालन गर्दा पाण्डेले सिंहदरबारभित्रै चन्दा आतंक मच्चाएको आरोप लागेको थियो । पाण्डेको क्रियाकलापको सर्वत्र आलोचना भएपछि प्रधानमन्त्री ओलीले उक्त कार्यक्रम नै बन्द गर्न निर्देशन दिएका थिए । त्यसपछि पाण्डेले आफू मुख्य व्यक्ति बनेर कथा नेपाल प्रालि नामको कम्पनी बनाएका थिए ।
सो कम्पनीले देखापढी डटकम नामको अनलाइन मिडिया सञ्चालन गर्दै आएको छ । त्यसका प्रकाशक पाण्डे आफैं हुन् । अहिले फेरि पाण्डेले आफ्नो पैसा माग्ने प्रस्ताव प्रधानमन्त्री कार्यालयबाटै अगाडि बढाउन सफल भएका हुन् । यसले अझै पनि प्रधानमन्त्रीको वरिपरि पैसा उठाएको बलियो जमात क्रियाशील छ भन्ने पुष्टि गरेको छ । पाण्डेको कम्पनीलाई पैसा उठाइदिन प्रधानमन्त्री ओलीले नै पत्राचार गर्न निर्देशन दिएको भन्नेमा चाहिँ आशंका छ । तर, बैंकका सीईओहरुलाई पैसाको लागि ताकेता गर्दा प्रधानमन्त्रीले नै निर्देशन दिएको भनेर सल्लाहकारबाट फोन जाने गरेको बैंकका सीईओहरुले आर्थिक दैनिकलाई जानकारी दिएका छन् ।
‘एउटा कम्पनीलाई प्रत्येक बैंकले चार लाख रुपैयाँको दरले प्रारम्भिक चरणमा चेक दिनु भन्नु सरासर ठगी धन्दा हो’, एक जना सीईओले भने, ‘प्रधानमन्त्री कार्यालयबाट एउटा कम्पनीलाई, अर्थमन्त्रीको कार्यालयबाट अर्को कम्पनीलाई, अन्य मन्त्रीको कार्यालयबाट अर्को कम्पनीलाई पैसा दिनु भनेर पत्र आयो भने के गर्ने ?’ पैसा उठाउनका लागि पत्र नै आउनु गलत भएको अर्को बैंकका सीईओले बताए । ‘यति पैसा एउटा कम्पनीलाई दिनैपर्छ भनेर पत्र पठाउनु भनेको ठगी धन्दा नै सञ्चालन गर्नुजस्तै हो’, ती सीईओले भने ।
क्याटेगोरी : समाचार
ताजा अपडेट
- युवा र युवती एकैठाउँमा मृत फेला
- राहदानी विभागको सेवा ठप्प सेवाग्राही आक्रोशित
- प्रतिनिधिसभा सचिव अधिकारीद्वारा राजीनामा
- स्वर्गीय राईप्रति अध्यक्ष दाहालद्वारा श्रद्धाञ्जली अर्पण
- ई–सेवाद्वारा ट्राफिक प्रहरीलाई मोबाइल फोन हस्तान्तरण
- फोहोरमैला व्यवस्थापन गर्न ढिलाइ नगरौँ: उपप्रधानमन्त्री सिंह
- सुनको मूल्य आज एक लाख ६७ हजार दुई सय कायम
- ‘सबैको पहुँचमा शुद्ध र स्वच्छ खानेपानी सेवा पुर्याउनु सरकारको प्रमुख दायित्व’
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया