नेपाल र कोरियाबीच द्विपक्षीय आर्थिक सम्बन्ध अभिवृद्धिबारे छलफल

काठमाडौं ।
नेपाल र कोरियाबीच द्विपक्षीय आर्थिक सम्बन्ध अभिवृद्धि गर्न नेपालका लागि दक्षिण कोरियाका राजदूत पार्क चोङ्ग–सुक र चेम्बर पदाधिकारीबीच छलफल भएको छ । नवनियक्त राजदूत पार्क चोङ्ग–सुक र नेपाल चेम्बर अफ कमर्सका अध्यक्ष राजेशकाजी श्रेष्ठ तथा पदाधिकारीबीचको छलफलमा राजदूत सुकले आफ्नो कार्यकालमा नेपाल तथा कोरियाबीच द्विपक्षीय आर्थिक सम्बन्धलाई प्रवर्द्धन गर्न कोरिया व्यापार तथा लगानी प्रवर्द्धन एजेन्सी (कोट्रा) सँग चेम्बरको सहकार्यको लागि पहल गर्ने बताए ।

यस्तै उनले दुई मुलुकबीच सूचना आदानप्रदान गर्नेसम्बन्धी सहकार्यको लागि आफूले प्रयास गरेको जानकारी दिए । कोरियाबाट प्रशिक्षित कामदारहरु नेपाल फर्किने भएकोले उनीहरुले सिकेको ज्ञान तथा सीप नेपालको लागि उपयोगी हुने उनले बताए । साथै कोरियामा रोजगारीको लागि सरल सहज व्यवस्थाका लागि पहल गर्ने बताए ।

नेपाल चेम्बरका अध्यक्ष राजेशकाजी श्रेष्ठले राजदूत सुकको कार्यकालको सफलताको कामना गर्दै चेम्बरले आफ्नो सात दशकको लामो, गतिशील र सार्थक कार्य गरी व्यापार तथा लगानी विकासका लागि पैरवी गरिरहेको बताए । सन् २०१५ देखि चेम्बर एक्स्पो नियमित रुपमा गरिरहेको, दक्षिण कोरियासँग कूटनीतिक सम्बन्ध स्थापनापछि व्यापार, लगानी, पर्यटन प्रवर्द्धनमा उल्लेखनीय विकास भएको तर नेपालबाट दक्षिण कोरियासँग व्यापारघाटा प्रत्येक वर्ष बढ्दै गएको उनको
भनाइ थियो ।

दुवै देशबीचमा आर्थिक सम्बन्ध अभिवृद्धि गर्नको लागि नेपाल चेम्बर र कोरिया चेम्बरबीच समझदारीपत्रमा हस्ताक्षर, लगानी तथा पर्यटन प्रवर्द्धन, दक्षिण कोरियाको प्रविधि नेपालमा भित्र्याउने, व्यापारिक प्रतिनिधिमण्डलको आदानप्रदान, सीप विकास र प्रशिक्षण, कृषि क्षेत्रको विकास, कोभिड १९ पछिको आपसी सहयोग आदि क्षेत्रहरुमा दक्षिण कोरियाबाट सहयोग, प्राविधिक सहायता आउने अपेक्षा एवं विश्वास अध्यक्ष श्रेष्ठले राखे । उतm स्वागत कार्यक्रममा नेपाल चेम्बरका वरिष्ठ उपाध्यक्ष राजेन्द्र मल्ल उपाध्यक्षद्वय कमलेश कुमार अग्रवाल, दिपक कुमार मलहोत्रा एवं कार्य समितिका सदस्यको पनि सहभागिता थियो ।