ट्रम्पको खाता बन्द गरेपछि ट्विटरको सेयर २ प्रतिशतले घट्यो

अमेरिका ।
संसारकै शक्तिशाली देश अमेरिकाको शक्तिशाली मान्छे राष्ट्रपति डोनाल्ड ट्रम्पको खाता सधैँका लागि बन्द गर्ने घोषणापछि सामाजिक सञ्जाल कम्पनी ट्विटरको सेयर मूल्य दुई प्रतिशतभन्दा धेरैले घटेको छ । रोयटर्सका अनुसार उक्त घोषणालगत्तै पछिको कारोबारमा सेयरबजारमा ट्विटरको सेयर प्रतिकित्ता ५०.२० अमेरिकी डलरमा कारोबार भएको थियो जुन अघिल्लो अन्तिम मूल्यभन्दा २.४ प्रतिशतले कम हो । गत बुधबार ट्विटरले ट्रम्पलाई अस्थायी रुपमा ब्लक गरेको थियो ।

ट्विटरमा ट्रम्पका आठ करोड ८० लाखभन्दा धेरै अनुयायी (फलोअर) थिए । ट्रम्प समर्थकले उनकै उक्साहटमा अमेरिकी संसद्मा कब्जा गरेर तोडफोड गरेको भन्दै ट्विटरले ट्रम्पको खाता सञ्चालनमा अस्थायी रोक लगाएको थियो तर पछि उसले ट्रम्पलाई सधैँका लागि बन्द गरिदिएको थियो ।