निगमले एसिडपीडितलाई एक वर्षको रोजगारी दियो

काठमाडौं ।
नेपाल आयल निगमले एसिडपीडित दुई जना महिलालाई एक वर्षको रोजगारी प्रदान गरेको छ । निगमले संस्थागत सामाजिक उत्तरदायित्वअन्तर्गत एसिड आक्रमणबाट पीडित बनेकी ओखलढुङ्गाकी पवित्रा कार्की र नवलपरासीकी वसन्ती परियारलाई रोजगारी दिएको हो ।

निगमले उनीहरुलाई जीवन निर्वाह खर्च उपलब्ध गराउने गरी गत पुस १६ गतेदेखि कामकाजमा लगाएको जनाएको छ । निगमका अनुसार एसिड पीडित दुवै जना निगमको सम्पर्कमा आएका थिए । उनीहरु दुवै जनाले कमजोर आर्थिक र शरीरमा तेजावको जलनका कारण अन्य शारीरिक कार्य गर्न असमर्थ रहेको र जीवन निर्वाह तथा नियमित औषधिको जोहो गर्न कठिनाइ भएको जानकारी गराएपछि निगमले योग्यताअनुसारको रोजगारीको व्यवस्था गरिदिएको जनाएको छ ।

एसिडपीडित दुवै जनालाई सामाजिकीकरणमा सहयोग पु-याई क्षमता विकास गर्नसक्ने अवसर जुटाइदिने तथा जीवनयापन औषधोपचारमा पुनरुत्थान र सामाजिक अन्तर्घुलन गराई निजको आत्मबल बढाई भविष्यमा आत्मनिर्भर बनाउने उद्देश्यका साथ रोजगार प्रदान गरिएको निगमका प्रवक्ता विनीतमणि उपाध्यायले जानकारी दिए । उनीहरुलाई न्यूनतम मासिक २० हजार रुपैयाँ पारिश्रमिक पाउने गरी कार्यालय सहयोगीको जिम्मेवारी दिइएको छ । एसिडपीडितलाई एक वर्षको करार गरेर काममा लगाइएको हो ।

निगमले पेट्रोलियम पदार्थको आयात, भण्डारण तथा बिक्रीवितरण व्यवस्थापनका अतिरिक्त संस्थागत सामाजिक उत्तरदायित्वअन्तर्गत विविध सामाजिक तथा कल्याणकारी कार्य गर्दै आइरहेको जनाएको छ । निगमले कोभिड–१९ रोकथाम तथा उपचार कोषमा ५० करोड रुपैयाँ सहयोग गरेको थियो ।

यस्तै निगमले खोटाङको हलेसी मन्दिरमा धर्मशाला निर्माण, लकडाउनका समयमा अपाङ्गता भएका तथा बेसहारा व्यक्ति, बालगृह, वृद्धाश्रमलगायतलाई एलपी ग्यासको सिलिन्डर उपलब्ध गराएर सामाजिक उत्तरदायित्वअन्तर्गत सेवा पु-याएको थियो ।