वाणिज्य बैंकहरूले छ महिनामा कमाए ३१ अर्ब

काठमाडौं ।
सञ्चालनमा रहेका २७ वटा वाणिज्य बैंकहरूले चालू आर्थिक वर्षको छ महिनाको अवधिमा ३१ अर्ब चार करोड ८२ लाख ३२ हजार रुपैयाँ खुद मुनाफा कमाएका छन् । बैंकहरूले सार्वजनिक गरेको चालू आवको दोस्रो त्रैमासिक अवधिको अपरिष्कृत वित्तीय विवरणअनुसार यो मुनाफा गत आवको सोही अवधिको तुलनामा भने केही कम हो । गत आवको सोही अवधिमा भने बैंकहरूको यस्तो नाफा ३१ अर्ब ३१ करोड १६ लाख ३६ हजार रुपैयाँ रहेको थियो ।

अपरिष्कृत वित्तीय विवरणअनुसार चालू आवको दोस्रो त्रैमासिकमा सबैभन्दा बढी नाफा ग्लोबल आईएमई बैंक, एनआईसी एसिया बैंक र नबिल बैंकले कमाएका छन् । ग्लोबल आईएमई बैंकले दुई अर्ब ३१ करोड ५१ लाख १८ हजार रुपैयाँ खुद मुनाफा कमाउँदा एनआईसी एसियाले दुई अर्ब छ करोड पाँच लाख ३७ हजार रुपैयाँ खुद मुनाफा कमाएको थियो ।

गत आवको सोही अवधिमा यी बैंकहरूको नाफा क्रमशः एक अर्ब ६८ करोड ५९ लाख आठ हजार र दुई अर्ब एक करोड ६२ लाख २५ हजार रुपैयाँ रहेको थियो । नबिल बैंकले भने चालू आवको दोस्रो त्रैमासिकमा दुई अर्ब एक करोड ६० लाख २३ हजार रुपैयाँ खुद मुनाफा कमाएको छ । गत आवको सोही अवधिमा नबिलको यस्तो नाफा दुई अर्ब चार करोड १८ लाख ६१ हजार रुपैयाँ रहेको थियो ।

प्राइम कमर्सियल बैंकले भने चालू आवको दोस्रो त्रैमासिकमा एक अर्ब ८१ करोड ३३ लाख २९ हजार रुपैयाँ खुद मुनाफा कमाउँदा राष्ट्रिय वाणिज्य बैंकले एक अर्ब ७४ करोड ८८ लाख ५९ हजार रुपैयाँ कमाएको थियो । गत आवको सोही अवधिमा भने यी बैंकहरूको नाफा क्रमशः एक अर्ब ३० करोड सात लाख ८७ हजार दुई अर्ब २० करोड ९४ लाख ८२ हजार रुपैयाँ रहेको थियो ।

गत आवको दोस्रो त्रैमासिकमा एक अर्ब नौ करोड २७ लाख ८५ हजार रुपैयाँ खुद मुनाफा कमाएको एनएमबी बैंकले भने चालू आवको दोस्रो त्रैमासिकमा एक अर्ब ६१ करोड ३९ लाख ७३ हजार रुपैयाँ खुद मुनाफा कमाएको थियो । नेपाल इन्भेष्टमेन्ट बैंक, प्रभुु बैंक र नेपाल बैंकले भने चालू आवको पछिल्लो अवधिमा क्रमशः एक अर्ब ५८ करोड ६६ लाख, एक अर्ब ५१ करोड ८६ लाख र एक अर्ब ३५ करोड चार लाख रुपैयाँ खुद मुनाफा कमाएका छन् ।

गत आवको सोही अवधिमा यी बैंकहरूको यस्तो नाफा क्रमशः एक अर्ब ६६ करोड ११ लाख, एक अर्ब आठ करोड ५७ लाख र एक अर्ब ३५ करोड २३ लाख रुपैयाँ रहेको थियो । कृषि विकास बैंक र मेगा बैंकको चालू आवको दोस्रो त्रैमासिक नाफा भने एक अर्ब ३२ करोड रुपैयाँको हाराहारीमा रहेको छ भने कुमारी बैंकको नाफा एक अर्ब २१ करोड रुपैयाँको हाराहारीमा रहेको छ । सानिमा बैंकले भने चालू आवको दोस्रो त्रैमासिकमा एक अर्ब छ करोड रुपैयाँ खुद मुनाफा कमाएको छ । गत आवको सोही अवधिमा सानिमाको यस्तो नाफा एक अर्ब १४ करोड रुपैयाँ रहेको थियो ।

चालू आवको दोस्रो त्रैमासिकमा सनराइज बैंक, नेपाल बंंगलादेश बैंक र सिद्धार्थ बैंकको चालू आवको दोस्रो त्रैमासिक नाफा भने ९० देखि ९५ करोडको बीचमा रहेको छ । सिटिजन्स बैंक, माछापुच्छ्रे बैंक, लक्ष्मी बैंकको चालू आवको दोस्रो त्रैमासिक नाफा ८० करोड रुपैयाँको हाराहारीमा रहँदा स्ट्यान्डर्ड चार्टर्ड र बैंक अफ काठमाण्डूको नाफा ७० करोड रुपैयाँको हाराहारीमा रहेको छ ।

यीबाहेक हिमालयन बैंक र नेपाल क्रेडिट एण्ड कमर्स बैंकको चालू आवको दोस्रो त्रैमासिक नाफा ६१ देखि ६५ करोड रुपैैयाँको बीचमा रहेको छ भने नेपाल एसबीआई बैंकको नाफा ५१ करोड ४८ लाख रुपैयाँ रहेको छ । चालू आवको दोस्रो त्रैमासिक अवधिमा सेञ्चुरी कमर्सियल बैंकले भने ४६ करोड ६५ लाख रुपैयाँ खुद मुनाफा कमाउँदा सिभिल बैंकले २० करोड २८ लाख रुपैयाँ खुद मुनाफा कमाएको छ ।