झुलाघाट नाका खुलाउन भारत असहमत

धनगढी ।
भारतसँग जोडिएका बैतडीको झुलाघाट नाका नेपाली पक्षले खुला गर्ने निर्णय गरेको भए पनि भारत भने असहमत देखिएको छ । सरकारले देशभरिका ३० नाका खोल्ने निर्णय गरेसँगै झुलाघाट नाका नेपाल पक्षबाट खुलेको छ । मन्त्रिपरिषद् निर्णयका आधारमा गृह मन्त्रालयले सीमा नाका खुला गर्ने निर्णय गरेको बैतडीका प्रमुख जिल्ला अधिकारी मोहनराज जोशीले जानकारी दिए ।

नेपाली पक्षबाट पहिलादेखि नाकामा आवतजावत खुकुलो गर्न आग्रह गरिएको भए पनि भारतीय पक्षबाट भने त्यस्तो नभएको प्रमुख जिल्ला अधिकारी जोशीको भनाइ छ । ‘सरकारको निर्णयबमोजिम नेपाली पक्षको तर्फबाट झुलाघाट नाका खुला रहेको भए पनि भारतीय पक्ष अझै तयार भइसकेको छैन’, उनले भने, ‘यो विषयमा दुवै देशका स्थानीय प्रशासनबीच छलफल गर्छौं, सरकारले गरेको निर्णयअनसार भारतीय स्थानीय प्रशासनलाई पत्र पठाउने तयारी छ ।’

सरकारको निर्णय हुनुभन्दा पहिला पनि झुलाघाट नाका प्रत्येक हप्ताको सोमबार र शुक्रबार खोल्ने सहमति भए पनि पछिल्लो समयमा त्यो सहमति पनि कार्यान्वयन नभएकाले तत्कालै भारतीय पक्षले नाका खोल्ने नखोल्ने विषयमा जानकारी आउन बाँकी रहेको जिल्ला प्रशासन कार्यालय बैतडीले जनाएको छ ।

सरकारले कोरोना भाइरसको जोखिम रोकथाम तथा नियन्त्रणका लागि भन्दै गत चैतदेखि नेपाल–भारत सीमा नाका बन्द गरेको थियो । नाका खोल्ने निर्णय गरेसँगै सुदूरपश्चिमका पनि भारतसँग जोडिएका चार नाका खुलेका छन । बैतडीको झुलाघाट, दार्चुलाको खलंगा–पुलघाट, कैलालीको गौरीफन्टा, कञ्चनपुरको गड्डाचौकी, नाका पूर्णरूपमा खुला गरिएको मन्त्रालयले जनाएको छ ।