आयोगका नवनियुक्त पदाधिकारीहरूद्वारा पदभार ग्रहण

काठमाडौं ।
राष्ट्रिय मानव अधिकार आयोगका नवनियुक्त अध्यक्ष तप बहादुर मगर तथा सदस्यहरू डा. सूर्य ढुङ्गेल, मिहिर ठाकुर, मनोज दुवाडी र लिली थापाले पदभार ग्रहण गरेका छन् । यसअघि आयोगका नवनियुक्त अध्यक्ष मगरले राष्ट्रपति विद्यादेवी भण्डारीको समुपस्थितिमा प्रधानन्यायधीश चोलेन्द्रशमशेर राणा समक्ष तथा सदस्यहरूले आयोगका अध्यक्षसमक्ष राष्ट्रपति भवन शीतलनिवासमा एक समारोहबीच सपथ ग्रहण गरेका थिए । संवैधानिक परिषद्ले नेपालको संविधानको धारा २४८ को उपधारा (२) बमोजिम आयोगको अध्यक्ष तथा सदस्यमा उनीहरूको नियुक्तिका लागि सिफारिस गरेको थियो ।

आयोगमा आयोजित पदभार ग्रहण कार्यक्रममा आयोगका अध्यक्ष तथा सदस्यहरूले मानव अधिकारको प्रभावकारी संरक्षण, सम्बद्र्धन तथा कार्यान्वयनको सुनिश्चितामा सक्रियतापूर्वक लागिरहने प्रतिबद्धता व्यक्त गरेका छन् । पदबहालीपछि बसेको नवनियुक्त पदाधिकारीहरूको पहिलो वैठकले पदाधिकारीमा नियुक्तिका लागि सिफारिस गर्ने संवैधानिक परिषद् तथा नियुक्तिका लागि राष्ट्रपतिलाई धन्यवाद ज्ञापन गर्ने निर्णय गरेको छ ।