पेट्रोलियम पदार्थको मूल्य वृद्धि

काठमाडौँ ।
नेपाल आयल निगमले शनिबार पुनः पेट्रोलियम पदार्थको मूल्य वृद्धि गरेको छ । इण्डियन आयल कर्पोरेसनबाट शुक्रबार प्राप्त मूल्यसूचीअनुसार १५ दिनमा ८१ करोड घाटा हुने अवस्था आएकाले मूल्यवृद्धि गरिएको हो ।निगमका अनुसार पेट्रोल, डिजल, मट्टीतेल र हवाइ इन्धनको मूल्य वृद्धि भएको छ ।

शनिबार मध्यरातदेखि लागू हुने गरी पेट्रोल, डिजल, मट्टीतेलमा प्रतिलिटर एकका दरले वृद्धि गरिएको छ । नयाँ मूल्यअनुसार पेट्रोल प्रतिलिटर एक सय २१ रुपैयाँ पुगेको छ । डिजल र मट्टीतेलको मूल्य प्रतिलिटर एक सय चार रुपैयाँ पुगेको छ । आन्तरिक उडानतर्फको हवाइ इन्धनको साबिकको बिक्री मूल्यमा दुई वृद्धि हुँदा प्रतिलिटर ७६ पुगेको छ । खाना पकाउने ग्यास र अन्तर्राष्ट्रिय उडानका लागि प्रयोग हुने हवाइ इन्धनको भने मूल्यवृद्धि गरिएको छैन ।

निगमका अनुसार मूल्य वृद्धिपछि पनि निगमलाई पेट्रोलमा छ रुपैयाँ ७२ पैसा, डिजलमा ४४ पैसा तथा खाना पकाउने एलपी ग्यासमा प्रतिसिलिण्डर चार सय १७ रुपैयाँ ४७ पैसा घाटा रहेको छ । त्यस आधारमा १५ दिनमा ७० करोड ६६ लाख घाटा हुनेछ । निमगका प्रवक्ता विनितमणि उपाध्यायका अनुसार नेपाल भारत सीमाको रक्सोलको तुलनामा वीरगञ्ज क्षेत्रमा पेट्रोलको मूल्य प्रतिलिटर २९ रुपैयाँ २३ पैसा र डिजल प्रतिलिटर ३५ रुपैयाँ ४१ पैसा नेपालतर्फ सस्तो छ ।