नेपाली युवा उद्यमी मञ्चद्वारा ४० अक्सिजन सिलिन्डर सहयोग

काठमाडौं ।
नेपाली युवा उद्यमी मञ्चले वीर अस्पतालको ट्रमा सेन्टर र टिचिङ अस्पताललाई ४७ लिटर क्षमताको ४० वटा अक्सिजन सिलिन्डर सहयोग गरेको छ । मञ्चका सदस्यहरुको संयुक्त पहलमा काठमाडौं च्याप्टर र काठमाडौं एडभाइजरी लिडरसिप ग्रुपबाट उक्त सिलिण्डर जम्मा गरिएको थियो ।

कोरोना भाइरसबाट संक्रमित बिरामीले समयमै अक्सिजन नपाएर ज्यान गुमाउनुपरिरहेको अवस्थामा केही सहयोग होस् भन्ने हेतुले अक्सिजन सहयोग गरेको मञ्चले जनाएको छ । दोस्रो चरणको कोरोना भाइरससँग जुध्न नेपालजस्तो देशका लागि निकै चुनौतीपूर्ण छ, यस महामारीले स्वास्थ्य क्षेत्रअन्तर्गत गम्भीर प्रकृतिका बिरामीलाई अक्सिजन अभावले उपचारमा थप समस्या सिर्जना गरेको छ ।

सन् २००३ मा स्थापना भएको मञ्चको मुख्य उद्देश्य युवा उद्यमीहरुबीच विचारको आदानप्रदान गर्नु र व्यवसाय सञ्चालनको लागि आवश्यक पर्ने ज्ञान, सीप, शिक्षा, साझेदारी तथा तालिमहरु उपलब्ध गराउनु रहेको छ । हाल एनवाईईएफको एपेक्स बडी (केन्द्रीय कार्यसमिति) मा सातै प्रदेशको प्रतिनिधित्व हुने गरी युवा उद्यमीहरुको सहभागिता रहेको छ र छ सयभन्दा बढी सदस्यहरु यस संस्थामा आबद्ध छन् ।