कोरोनाका कारण निजी क्षेत्र मारमा
सुबास बस्नेत २०७८, असार २८ ११:०९ 
दोलखा । विश्व महामारीको रूपमा फैलिएको पहिलो र दोस्रो लहरको कोरोना भाइरसको कारण जिल्लाका सम्पूर्ण व्यवसायी मारमा परेका छन् । कोरोना संक्रमण रोकथाम तथा नियन्त्रणका लागि गरिएको लामो समयको निषेधाज्ञाका कारण यहाँका व्यवसायीहरू मारमा परेका हुन् ।
कोरोनाको जोखिम निरन्तर चलिरहेको अवस्थामा व्यवसायीलाई खोप उपलब्ध गराउन सरकारले चासो नदिएको कारण व्यवसायीले तत्काल व्यवसाय खोल्ने अवस्था नरहेको हुँदा निजी क्षेत्र थप मारमा परेको दोलखा चेम्बर अफ कमर्सले जनाएको छ । निजी क्षेत्रलाई पनि कोरोनाविरुद्धको खोप उपलब्ध गराई आर्थिक क्षेत्रलाई चलायमान बनाउन चेम्बरले माग गरेको छ । दोलखा चेम्बर अफ कमर्सका महासचिव पाण्डव सिङ पाण्डेका अनुसार जिल्लामा साना, मझौतादेखि ठूला लगानीका व्यवसाय सञ्चालनमा छन् ।
धार्मिक तथा पर्यटकीय क्षेत्र कालिन्चोकोमा करोडौँ रकम लगानी गरेर सञ्चालन गरिएका व्यवसाय कोरोनाले डेढ वर्षदेखि प्रभावित बनेका छन् । कालिञ्चोक कुरीका लाखौँ लगानीका चार दर्जन बढी होटल र करोडौँ लगानी गरेर सञ्चालन गरिएको केवलकार अहिले कोरोना भाइरसको कारण बन्द छ । वैशाखयता सधैँ भरीभराउ देखिने कुरी बजारमा अहिले सुनसान देखिने गरेको कुरी बजारका होटल सञ्चालक डम्बर तामाङले बताए ।
पहिलो लहरको कोभिडले झन्डै १० महिना सुनसान बनेको कालिञ्चोक दोस्रो लहरको कोरोना भाइरसले विगत तीन महिनादेखि सुनसान छ । राम्रो आम्दानी गर्ने उद्देश्यले लाखौँ लगानी गरेर खोलेको होटल रेस्टुरेन्टको लगानी संकटमा पर्दा असार मसान्तमा बैंक तथा वित्तीय संस्थाको किस्ता, हर्जना तिर्नै समस्या भएको कुरीका अर्का व्यवसाय नवराज तामाङले बताए । दोस्रो लहरको कोरोनाले मुख्यतया जिल्लाका ठूला लगानीकर्ता र होटल व्यवसायी मारमा परेका छन् । दोलखा जिल्लाका प्रमुख व्यापारिक केन्द्र चरीकोट, जिरी, सिंगटी र मैनापोखरीको व्यापार व्यवसाय दोस्रो लहरको कोरोना भाइरसले थप प्रभावित बनेको व्यवसायी कमल चौहानले बताए ।
पोखरा फुड्स प्रालिको सेल्स गर्दै आएका उनले फुड्सका सामानको माग कोरोनाको कारण घटेको बताए । ‘वैशाख अघि सामानको माग राम्रो हुँदा बजारमा सबै सामान जाने गथ्र्यो, अहिले सयौँ काटुन सामान गोदाममै थन्किएको छ ।’ गत वैशाखदेखि दोलखामा निषेधाज्ञा जारी रहेको छ ।
महिनामा लाखौँको कपडा बिक्री गर्ने मैनापोखरी बजारका फेन्सी व्यवसायी रोहन अधिकारी भन्छन्, ‘कोरोनाले व्यापार घटेको छ । बिहान र दिउँसो सामान्य व्यापार भए–भयो नत्र दिनभर पसल खोलेर मात्र बस्नुपरेको छ ।’ साझ परेपछि प्रहरीले पसल बन्द गर्ने निर्देशन दिने र बिहान र दिउँसो व्यापार शून्य रहेको उनले बताए । सटर भाडा, सहकारी, बैंकको ऋण तिर्न समेत समस्या हुने गरेको अधिकारीले बताए ।
यता सदरमुकाम चरीकोटमा भने अघिल्लो सातदेखि होटल र बजारमा केही चहलपहल बढेको छ । आर्थिक वर्ष सकिन एक साता बाँकी रहँदा निषेधाज्ञा केही खुकुलो भएको कारण सदरमुकामको व्यापार व्यवसायमा सामान्य चहलपहल देखिएको चरीकोटका होटल व्यवसायी भरत श्रेष्ठले बताए । चरीकोट बजारमा असारे विकासको अन्तिम चरण पुगेकाले बिल भुक्तानी गर्न आउने तथा सरकारी कामकाजमा आएका मानिसको ओहोरदोहोरले चहलपहल बढेको हो ।
क्याटेगोरी : बिबिध
ताजा अपडेट
- एमाले लुम्बिनी प्रदेश सभा सदस्य दुर्गा चौधरी पार्टी सदस्यबाट निलम्बित
- अदालतले पक्राउ पुर्जी जारी गरेका प्रहरी (इन्स्पेक्टर) १ बर्ष देखि कार्यरत रहेको खुलासा !
- राष्ट्रिय स्वतन्त्र पार्टी (रास्वपा)को धादिङ जिल्ला भेला सम्पन्न
- ‘जलवायु सङ्कट सामना गर्न सहकार्य आवश्यक’
- कीर्तिपुरमा विकास र सुशासनका मुद्दासहित चुनाव प्रचार तीव्र
- सामाजिक सुरक्षाकोषमा निजी क्षेत्र आबद्ध हुनैपर्ने
- धुलाबारीमा अतिक्रमित संरचना हटाउँदै मेचीनगर
- २७ सय १६ बिन्दुमा उक्लियो शेयर बजार
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया