सिभिल सेभिङ एण्ड क्रेडिट को–अपरेटिभ घोटाला प्रकरण
हालसम्म एक हजार एक सय ६७ वटा उजुरी, चार अर्ब ६६ करोड रुपैयाँ दाबी
सुरेश राउत २०७८, कात्तिक ७ ०७:५८ 
काठमाडौँ । पूर्वसांसद एवं सिभिल बैंक सञ्चालक समितिका अध्यक्ष समेत रहेका इच्छाराज तामाङको नेतृत्वमा संगठित रुपमा सिभिल सेभिङ एण्ड क्रेडिट को–अपरेटिभ लिमिटेडको घोटाला प्रकरणमा हालसम्म एक हजार एक सय ६७ वटा उजुरी परेको छ । केन्द्रीय अनुसन्धान ब्युरो (सीआईबी)का प्रवक्ता एवं सूचना अधिकारी प्रहरी उपरीक्षक श्याम कुमार महतोका अनुसार शुक्रबारसम्म तामाङविरुद्ध परेको उक्त उजुरीकै आधारमा कुल दाबी रकम हालसम्म चार अर्ब ६६ करोड १५ लाख ८२ हजार दुुई सय रुपैयाँ पुगिसकेको छ ।
सिभिल सेभिङ एण्ड क्रेडिटमा बचतकर्ताहरुको निक्षेप रकम घोटाला गरेको प्रकरणमा यही असोज १८ गते सीआईबीको टोलीले तामाङसहित अन्य १२ जनालाई पक्राउ गरेको थियो । ‘पक्राउलगत्तै सीआईबीले अन्य निक्षेपकर्ता तथा सर्वसाधारणहरुलाई उक्त को–अपरेटिभबाट निक्षेप तथा ब्याज रकम नपाएको भए कानुनबमोजिम आवश्यक थप कारबाहीको लागि समेत सीआईबीमा सम्पर्क गर्न आग्रह गरेकोमा हालसम्म एक हजार एक सयभन्दा बढी उजुरी परेको हो’, सीआईबीका प्रवक्ता एवं सूचना अधिकारी प्रहरी उपरीक्षक महतोले भने । पक्राउ परेका तामाङसहित १२ जनाको हकमा अहिले मुुलुकी अपराध संहिता २०७४ र संगठित अपराध निवारण ऐन २०७० अनुसार अनुसन्धान भइरहेकाले उजुरी अझै बढ्नसक्ने उनको भनाइ छ ।
पक्राउ परेका तामाङसहित १२ जना व्यक्तिमाथि पछिल्लो पटक संगठित अपराध निवारण ऐन २०७० अनुसार अनुसन्धान गर्न दोस्रो पटक १८ दिन म्याद थप भएको छ । ‘यसअघि अनुसन्धानको लागि पहिलो पटक पाँच दिनको लागि म्याद थप भएकोमा हालसम्म तामाङउपर अनुसन्धान गर्नको लागि २३ दिनको लागि म्याद थप भएको छ’, प्रवक्ता प्रहरी उपरीक्षक महतोले भने ।
सुरुमा उक्त सिभिल सेभिङमा बचत रकम जम्मा गर्ने एक सय ३७ जना पीडित बचतकर्ताहरुको ७० करोड रुपैयाँभन्दा बढी रकम फिर्ता नदिएको भन्दै परेको उजुरीका आधारमा पूर्वसांसद समेत रहेका तामाङसहित १२ जना पक्राउ परेका थिए । पक्राउ पर्नेहरुमा इच्छाराज तामाङ (सिभिल सेभिङ एण्ड क्रेडिट को–अपरेटिभ लिमिटेडका पूर्वअध्यक्ष, पूर्वसभासद एवं सिभिल बैंकको अध्यक्ष), केशवलाल श्रेष्ठ (सञ्चालक समितिको अध्यक्ष), भगवान बहादुर सिंह (सहजकर्ता प्रबन्धक), मायोनानी महर्जन (जुनियर असिसटेन्ट मेनेजर), एलिना तुलाधर (जुनियर असिसटेन्ट मेनेजर), शंकर प्रसाद पाठक (जुनियर अधिकृत), संगीत श्रेष्ठ (असिस्टेन्ट), राकेश महर्जन (लेखा अधिकृत), बुद्धराज तामाङ (जुनियर सहायक प्रबन्धक), कौस्तुभ केतन ढुंगाना (जुनियर सहायक प्रबन्धक), विजय विक्रम शाह (सिभिल होम्सका वरिष्ठ प्रबन्धक) र हरिहर लामिछाने (पूर्वलेखा समिति सदस्य) रहेका थिए ।
अनुुसन्धानका क्रममा उक्त सहकारीमा कुुल दुई हजार ५६ जना बचतकर्ताहरुको सात अर्ब ३६ करोड ३८ लाख ११ हजार रुपैयाँबराबरको बचत रहेको र यो पक्राउ परेका १२ जनाको समूहले बचतकर्ताहरुको यो रकमको चरम दुरुपयोग गरेको देखिएको सीआईबीले जनाएको छ ।
क्याटेगोरी : समाचार
ताजा अपडेट
- एमाले लुम्बिनी प्रदेश सभा सदस्य दुर्गा चौधरी पार्टी सदस्यबाट निलम्बित
- अदालतले पक्राउ पुर्जी जारी गरेका प्रहरी (इन्स्पेक्टर) १ बर्ष देखि कार्यरत रहेको खुलासा !
- राष्ट्रिय स्वतन्त्र पार्टी (रास्वपा)को धादिङ जिल्ला भेला सम्पन्न
- ‘जलवायु सङ्कट सामना गर्न सहकार्य आवश्यक’
- कीर्तिपुरमा विकास र सुशासनका मुद्दासहित चुनाव प्रचार तीव्र
- सामाजिक सुरक्षाकोषमा निजी क्षेत्र आबद्ध हुनैपर्ने
- धुलाबारीमा अतिक्रमित संरचना हटाउँदै मेचीनगर
- २७ सय १६ बिन्दुमा उक्लियो शेयर बजार
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया