१०४ प्रतिशतले बढ्यो उद्योगमा लगानी प्रस्ताव
प्रवीण राउत २०७९, असार ५ ११:०० 
काठमाडौं । मुलुकको उद्योग क्षेत्रमा गरिने लगानीमा एक सय चार प्रतिशतले वृद्धि भएको छ । गत आर्थिक वर्षको तुलनामा चालू आर्थिक वर्षको ११ महिनाको अवधिमा एक सय चार प्रतिशत अर्थात् एक खर्ब ५५ अर्ब ६७ करोड रुपैयाँले उद्योगमा गरिने लगानी प्रतिबद्धता बढेको छ । उक्त लगानी प्रतिबद्धता स्वदेशी र विदेशी लगानीकर्ताबाट आएको उद्योग विभागले बताएको छ ।
विभागका अनुसार गत आर्थिक वर्षको ११ महिनाको अवधिमा एक खर्ब ४८ अर्ब ३१ करोड रुपैयाँ र चालू आर्थिक वर्षको सोही अवधिमा तीन खर्ब तीन अर्ब ९८ करोड रुपैयाँ लगानी प्रतिबद्धता आएको छ । गत आर्थिक वर्षमा एक सय ८७ वटा उद्योग र १० हजार आठ सय ५५ जनालाई रोजगारी तथा चालू आर्थिक वर्षमा दुई सय ७४ वटा उद्योग र २५ हजार आठ सय २१ जनालाई रोजगारी दिने उद्देश्यका साथ उक्त लगानी प्रतिबद्धता आएको हो ।
कृषि तथा वन पैदावरमा आधारित, ऊर्जामूलक, सूचना, प्रसारण तथा सञ्चार प्रविधि, उत्पादनमूलक, सेवामूलक र पर्यटनमूलक गरी छ प्रकारका विभागमा दर्ता हुन्छन् । उनीहरुले ती छ प्रकारका उद्योगमा लगानी गरेका हुन् ।
सोही क्रममा उनीहरुले चालू आर्थिक वर्षको ११ महिनाको अवधिमा सबैभन्दा बढी ऊर्जाजन्यमा एक खर्ब ४५ अर्ब ८७ करोड रुपैयाँ, उत्पादनजन्यमा ८० अर्ब ३१ करोड ७७ लाख रुपैयाँ, सेवाजन्यमा ४३ अर्ब ९६ करोड ५३ करोड रुपैयाँ, पर्यटनजन्यमा २४ अर्ब ४४ करोड ३९ लाख रुपैयाँ, कृषि तथा वन पैदावरजन्यमा पाँच अर्ब आठ करोड ९१ लाख रुपैयाँ, सूचना प्रविधिजन्यमा एक अर्ब ८९ करोड ८५ लाख रुपैयाँ, पूर्वाधारजन्यमा दुई अर्ब २७ करोड ९१ लाख रुपैयाँ र खनिजजन्यमा ११ करोड ५७ लाख रुपैयाँ लगानी प्रतिबद्धता जनाएका छन् ।
ऊर्जाजन्य ४१ वटा, उन्पादनजन्य एक सय छवटा, सेवाजन्य ४१ वटा, पर्यटनजन्य ४९ वटा, कृषि तथा वन पैदावरजन्य २० वटा, सूचना प्रविधिजन्य ११ वटा, पूर्वाधारजन्य पाँच वटा र खनिजजन्य एउटा उद्योग स्थापना गर्न लागि उक्त लगानी प्रस्ताव गरेका हुन् । पर्याप्त पानी र उपयुक्त भू–बनोटको कारण स्वदेशी तथा विदेशी लगानीकर्ताहरुले नेपालको ऊर्जा अर्थात् विद्युत् गृह स्थापना गर्न आकर्षित भएको पाइन्छ ।
गत आर्थिक वर्षको सोही अवधिमा पनि ऊर्जाजन्यमा सबैभन्दा बढी एक खर्ब छ अर्ब २८ करोड रुपैयाँ, उत्पादनजन्यमा १७ अर्ब ५१ करोड ४७ लाख रुपैयाँ, पर्यटनजन्यमा ११ अर्ब ३२ करोड ४७ लाख रुपैयाँ, सेवाजन्यमा पाँच अर्ब ४० करोड ७१ लाख रुपैयाँ, कृषि तथा वन पैदावरजन्यमा पाँच अर्ब २६ करोड ३५ लाख रुपैयाँ, पूर्वाधारजन्यमा एक अर्ब ७३ करोड ८३ लाख रुपैयाँ, सूचना, सञ्चार तथा प्रसारण प्रविधिमा ६५ करोड रुपैयाँ र खनिजमा १२ करोड ३४ लाख रुपैयाँँ लगानी प्रतिबद्धता जनाएका थिए । उक्त लगानी प्रतिबद्धता ऊर्जाजन्य २९ वटा, उत्पादनजन्य ६३ वटा, पर्यटनजन्य ३६ वटा, सेवाजन्य ३१ वटा, कृषि तथा वन पैदावरजन्य २० वटा, पूर्वाधारजन्य दुईवटा, सूचना, सञ्चार तथा प्रसारण प्रविधिजन्य पाँचवटा र खनिजजन्य एउटा उद्योग स्थापनाका लागि जनाएका हुन् ।
स्वदेशी तथा विदेशी लगानीकर्ताहरुमार्फत उद्योगमा गरिने लगानी प्रस्ताव मोटो रकम आउने गरे पनि त्यसको कार्यान्वयन गरेको पाइँदैन । जसले गर्दा लगानी नआउने, उद्योग स्थापना हुन नसक्ने र रोजगारीको अवसर समेत प्राप्त हुँदैन । यसलाई कार्यान्वयन गर्न गराउन निजी क्षेत्र, सरकारी निकाय र विदेशी लगानीकर्ताहरुबीच समन्वय आवश्यक रहेको छ । सरकारले उद्योग क्षेत्रमा लगानी बढाउन विभिन्न सभा–सम्मलेन गरे पनि त्यसले सार्थकता पाउनसकेको छैन । विभागका साथै लगानी बोर्डबाट समेत नेपालको उद्योग क्षेत्रमा ठूलो लगानी आउने गरेको पाइन्छ ।
स्वदेशी लगानीकर्ताहरुले औद्योगिक व्यावसायिक ऐन २०७६ र विदेशी लगानीकर्ताहरुले प्रत्यक्ष विदेशी लगानीमार्फत नेपालको उद्योग क्षेत्रमा लगानी गर्न पाउँछन् । त्यस्तै सार्वजनिक निजी साझेदारी तथा लगानी ऐन, २०७५, राष्टिय बौद्धिक सम्पत्ति नीति, २०७३, विदेशी लगानी नीति, २०७१ , औद्योगिक नीति, २०७६ , कम्पनी ऐन, २०६३ लगायतले नेपालमा उद्योग स्थापना तथा लगानी ल्याउन सहयोग गरेको छ । (आर्थिक दैनिकबाट)
क्याटेगोरी : समाचार
ताजा अपडेट
- प्रधानमन्त्री ओली न्युयोर्क प्रस्थान
- विकासमा महिलावादी सिद्धान्तको महत्व
- दोलखामा रहेको नेपाली सेनाको गरुडदल गणद्धारा आगोलागि पिडितको घर निर्माण
- यसकारण भ्रष्ट छ नेपालको राजनीति
- आम्दानी र खर्च घटेको अर्थ कसरी सुधारियो ?
- अवैध लागुऔषधसहित तीन जना पक्राउ
- मनाइयो संविधान दिवस
- ठमेलमा ‘ठमेल नखः’ महोत्सव हुने
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- ढोरपाटन जोड्ने सडक कालोपत्रे गरिँदै
- चिया पसल पनि कम्पनी ?
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया