अध्यक्ष नेपाललाई राष्ट्रपतिका रूपमा अघि सार्ने तयारी

काठमाडौं । एकीकृत समाजवादी, नेकपा माओवादी र जनता समाजवादीले एकीकृत समाजवादीका अध्यक्ष माधवकुमार नेपाललाई राष्ट्रपतिको उम्मेदवारका रूपमा अघि सार्ने तयारी गरेका  छन् ।

माओवादी केन्द्र संसदीय दलको कार्यालय सिंहदरबारमा बिहीबार साँझ बसेको तीन दलको बैठकमा अध्यक्ष नेपाललाई राष्ट्रपतिका रूपमा अघि सार्न र राष्ट्रिय सहमति खोज्न नेपाली कांग्रेस र नेकपा एमालेसँग संवाद गर्ने सहमति भएको हो । त्यसका लागि कांग्रेस र एमालेसँग शुक्रबार संवाद गरेर राष्ट्रिय सहमति जुटाउन प्रयास गर्ने नेताहरूले बताएका छन् । तीन दलको शुक्रबारको बैठकले माधव नेपाललाई राष्ट्रपतिको उम्मेदवारका रूपमा अघि सार्ने बताएको छ ।

बैठकमा माधव नेपाललाई एकीकृत समाजवादी र जनता समाजवादीका नेताहरूले राष्ट्रपतिका रूपमा अघि सार्ने प्रस्ताव गरेका थिए । सो प्रस्तावलाई माओवादीले छलफल गर्न सकिने बताएको छ ।

बैठकपछि सिंहदरबारमा सञ्चारकर्मीहरूसँग कुरा गर्दै जसपाका नेता राजेन्द्र श्रेष्ठले शुक्रबारको छलफलपछि नयाँ गठबन्धन बन्ने वा नबन्ने भन्ने टुङ्गो लाग्ने बताए । ’तीन दल र नेपाली कांग्रेसबीच शनिबार छलफल गर्ने सहमति भएको छ, शनिबार उहाँहरूसँग छलफल गरेपछि राष्ट्रपतिको उम्मेदवार को हुने भन्ने टुङ्गो लाग्छ’, श्रेष्ठले भने ।

दलहरुबीच छलफल भए पनि ठोस सहमति हुन बाँकी रहेको नेकपा एकीकृत समाजवादीका उपमहासचिव प्रकाश ज्वालाले प्रतिक्रिया दिएका छन् । ज्वालाले राष्ट्रिय सहमतिको रूपमा अध्यक्ष नेपाललाई राष्ट्रपतिको उम्मेदवार बनाए त्यसलाई अस्वीकार नगर्ने बताए ।