पुटिनको भविष्य कसरी युक्रेन युद्धसँग जोडिएको छ ?

राष्ट्रपति पुटिनले कुनै बेला देशमा स्थायित्व ल्याएका कारण प्रतिष्ठा कमाए। त्यो सैनिकहरूको बढ्दो सङ्ख्या, परिचालन र आर्थिक प्रतिबन्धहरूको बीचमा हराएको छ।

युद्ध सुरु भएदेखि लाखौँ रुसीहरूले देश छोडेका छन्। त्यस्तो गर्नेमा धेरै युवा, दक्ष जनशक्ति र शिक्षित मानिसहरू छन्। यस्तो जनशक्ति बाहिरिनुले रुसको अर्थतन्त्रलाई अझ बढी चोट पुर्‍याउनेछ।

अचानक भएको युद्धका कारण रुसमा हाल त्यस्ता कैयौँ समूहहरू छन् जोसँग बन्दुक छ। त्यसमा भाडाका सैनिक परिचालन गर्ने वाग्नर समूह र क्षेत्रीय बटालियन पनि समावेश छन्।

देशका सशस्त्र निकायहरूसँगको सम्बन्ध सुमधुर छैन। रुसको रक्षा मन्त्रालय र वाग्नरबीच सार्वजनिक रूपमै देखिएको मतभेदले त्यहाँका कुलिन वर्गबीचको समस्या देखाएको छ।

अस्थिरता र भाडाका सैनिक एउटा खतरनाक सम्मिश्रण हो।

“गृहयुद्धले रुसलाई अर्को दशकसम्म ढाक्ने सम्भावना छ,” मस्कोको पत्रिका नेजाभिसिमाया गजेटाका लगानीकर्ता तथा सम्पादक कोन्स्टेन्टीन रेम्चुकोभले भने। “त्यस्ता धेरै स्वार्थ समूहहरू छन् जसले यस्ता परिस्थितिमा सम्पत्ति पुनः वितरण गर्ने मौका भएको कुरा बुझेका छन्।”

“गृहयुद्धबाट बच्ने मौका पुटिन लगत्तै सही व्यक्ति सत्तामा आए मात्र हुनेछ। त्यस्ता व्यक्ति जसको देशका सम्भ्रान्त वर्गहरूमाथि पकड छ र परिस्थितिको फाइदा उठाउन चाहनेहरूलाई अलग गर्ने दृढता।”

“के रुसी सम्भ्रान्तहरूले त्यसकालागि सही पुरुष वा महिला को हुनसक्छ भनेर छलफल गरिरहेका छन्?” मैले कोन्स्टेन्टीनलाई सोधेँ।

“चुपचाप। बत्ती निभाएर। उनीहरू यसबारे छलफल गर्छन्। उनीहरूको पक्कै आवाज हुनेछ।”

“के पुटिनलाई थाहा छ यी छलफलहरू भइरहेका छन्?”

“उनलाई थाहा छ। मलाई लाग्छ उनलाई सबै थाहा छ।”

यसै साता रुसको संसद्को तल्लो सदनका सभामुखले घोषणा गरे: “जबसम्म पुटिन छन्, तबसम्म रुस रहन्छ।”

यो वफादारीको कथन थियो, वास्तविकता होइन।

रुस टिकी राख्नेछ – शताब्दीयौं देखि उ त्यस्तो गर्न सफल भएको छ। यद्यपि भ्लादिमिर पुटिनको भाग्य भने अब युक्रेनको युद्धको नतिजासँग अपरिवर्तनीय रूपमा जोडिएको छ। (बीबीसी)