विद्यादेवी भण्डारी शीतल निवासबाट बिदा भइन्

काठमाडौं । लगातार दुई कार्यकाल पूरा गरी शीतल निवासबाट राष्ट्रपति विद्यादेवी भण्डारी सोमबार बिदा भएकी छिन् । उनलाई नव नियुक्त राष्ट्रपति रामचन्द्र पौडेलले गाडीसम्मै पुगेर बिदाइ गरेका हुन् ।

राष्ट्रपति भण्डारी बुढानीलकण्ठस्थित निजी निवासमा जाने भनिए पनि मर्मतको काम पूरा नभएकाले उनी शीतल निवासबाट बालुवाटारस्थित छोरीको निवासमा गएकी छिन् । प्रधानमन्त्री पुष्पकमल दाहाल प्रचण्डले भण्डारीलाई उपहार स्वरुप आँखीझ्याल दिएर बिदाइ गरेका थिए ।

शीतल निवासबाट निजी निवासमा जाँदै गर्दा भण्डारीलाई नेपाली सेनाको टोलीले टुँडिखेलबाट २१ तोपको सलामी दिएको थियो । २०७२ कात्तिक ११ गते राष्ट्रपति पदमा पहिलोपटक निर्वाचित भएकी भण्डारी त्यसपछि फेरि दोस्रो कार्यकालका लागि २०७४ साल फागुन २९ गते निर्वाचित भएकी थिइन् ।