सगरमाथा क्षेत्रका पर्यटन व्यवसायी उत्साहित

सोलुखुम्बु । विश्वको प्रमुख पर्यटकिय गन्तव्य सगरमाथा क्षेत्रमा पर्यटन आवगमन सुरु भएसँगै व्यवसायी उत्साहित बनेका छन् । सिजनको सुरुवातदेखि नै पर्यटक आवगमन बाक्लिदा व्यवसायीहरू उत्साहित बनेका हुन् ।

सिजनको सुरु देखि नै विदेशी तथा स्वदेशी पर्यटकहरूको आवगमन बाक्लिदा खुम्बुका व्यवसायीहरूको दैनिकी पर्यटकको स्वागत सत्कारमा वित्ने गरेको लुक्लाका होटल व्यवसायी कामी शेर्पाले बताइन् । अघिल्ला दुई वर्ष सन २०२० र ०२१ मा लगभग ठप्प नै बनेको खुम्बुको पर्यटन त्यस यता निरन्तर लयमा फर्किने क्रममा रहेको छ । खुम्बुमा बैशाख जेठ, असार र असोज कार्तिक, मंसिर गरि वर्षमा दुई सिजनलाई मुख्य पर्यटकिय सिजन मानिन्छ । तर यस वर्ष सिजनको सुरु हुनु पुवृ नै पर्यटन गतिविधि चलायमान हुँदा पर्यटन व्यवसायीलाई राहत मिलेको व्यवसायी सुबास बस्नेत बताउछन् । कोरोना कहरपछि सगरमाथा क्षेत्रमा ५० हजार भन्दा बढी पर्यटकले भ्रमण गरेको सगरमाथा राष्ट्रिय निकुञ्जको कार्यालय नाम्चेको तथ्यांक छ ।

खुम्बुको पर्यटन क्षेत्रलाई थप व्यवस्थित गर्न विशेष प्याकेजका साथ अघि बढ्ने ट्रेकिङ एजेन्सिज एसोसियसन अफ नेपाल (टान) काअध्यक्ष निलहरी बास्तोलाको भनाई छ । कोरोना महामारीले थलिएका पर्यटकीय क्षेत्रहरू त्यस यताका वर्षहरूमा विस्तारै तङ्ग्रिदै गएका छन् । सिजनको सुरुवात देखि नै पर्यटन आवगमन उत्साहजनक हुँदा व्यवसायहरूले राहतको महसुस गरेका छन् । तर पछिल्लो समय मौसम निरन्तर प्रतिकुल हुँदा समस्या भएको व्यवसायीहरू बताउँछन् । मौसममा आएको परिवर्तनका कारण जहाज उडान तथा अवतरण प्रभावित हुँदा पर्यटक आवगमनमै असर परेको नाम्चेका पर्यटन व्यवसायी लामाकाजी शेर्पाले बताए ।