एडिडासविरुद्ध मुद्दा

अमेरिका । चर्चित पहिरन कम्पनी एडिडासविरुद्ध लगानीकर्ताहरुले मुद्दा दायर गरेका छन् । उनीहरुले -यापर कान्ये वेस्टको समस्यापूर्ण व्यवहार धेरै पहिले नै थाहा पाए पनि पछि मात्र उनीसँगको साझेदारी तोडेको दाबी गर्दै मुद्दा दायर गरेका हुन् ।

पहिले नै उनीसँगको सम्बन्ध नतोडेर कम्पनीलाई बढी नोक्सानी पु-याएको उनीहरुको आरोप छ । तर एडिडासले भने यी दाबीमा कुनै सत्यता नरहेको प्रतिक्रिया जनाएको छ । कम्पनीले आरोप अस्वीकार गर्दै बलियो प्रतिरक्षा गर्ने जनाएको छ । वेस्टविरुद्ध भने मुद्दा हालिएको छैन । वेस्टले एडिडासका लागि यिजी ब्रान्डअन्तर्गत सफल ट्रेनर लाइन डिजाइन गरेका थिए । त्यसयता एडिडासले दशौँ सय करोड युरोबराबरका नबिकेका यिजी उत्पादनका कारण ७० करोड युरो गुमाउनसक्ने स्वीकारेको थियो ।

गत अक्टोबरमा कम्पनीले वेस्टसँगको साझेदारी समाप्त गरेको थियो । वेस्टले घृणित र नश्लीय अभिव्यक्ति दिएको र त्यसको समर्थन गर्न नसकिने जनाउँदै एडिडासले उनीसँगको व्यापारिक सम्बन्ध अन्त्य गरेको थियो । तर लगानीकर्ताहरुले भने गत शुक्रबार उनीविरुद्ध मुद्दा हाल्दै पहिले नै थाहा पाएर पनि तत्काल कदम नचालेको कम्पनीविरुद्ध आरोप लगाएका छन् । यता द वाल स्ट्रिट जर्नलले वेस्टसँग एडिडासले सन् २०१८ मै यसबारे छलफल गरेको विवरण प्रकाशित गरेको थियो ।