आईएमई लाइफको सम्पत्ति शुद्धीकरणसम्बन्धी तालिम

काठमाडौं । आईएमई लाइफ इन्स्योरेन्स लिमिटेडले सातै प्रदेशमा सम्पत्ति शुद्धीकरण तथा आतङ्ककारी क्रियाकलापमा वित्तीय लगानी निवारणसम्बन्धी तालिम प्रदान गर्दै आएको छ । इन्स्योरेन्सले काठमाडौंको कान्तिपथस्थित होटल यल्लो प्यागोडामा सातै प्रदेशका प्रमुख, क्षेत्रीय प्रमुख तथा व्यवस्थापन समूहका ३० जनालाई तालिम प्रदान गरेको हो ।

आपराधिक क्रियाकलाप र गैरकानुनी काम गरी आर्जन गरेको रकम बैंक र बीमाको माध्यमले शुद्धीकरण गर्ने गरिएको छ । यस्तो कार्यलाई निरूत्साहित र निवारण गर्न कर्मचारीहरूलाई यससम्बन्धी कानुनी व्यवस्था, शुद्धीकरणका प्रयास, रिपोर्टिङको तरिका र निवारणका प्रक्रियाबारेमा कम्पनीले तालिम प्रदान गरेको हो । कम्पनीका कम्प्लायन्स प्रमुख ममता जयसवालले सम्पति शुद्धीकरण निवारण तथा आतङ्कवादी क्रियाकलापमा वित्तीय लगानी निवारण सम्बन्धमा विस्तृत प्रशिक्षण दिएकी थिइन् ।

गैरकानुनी कमाइ र आतङ्कवादी कार्यबाट संकलित कालोधनलाई बीमा क्षेत्रको माध्यमले शुद्धीकरण गर्ने कार्यलाई कसरी नियन्त्रण गर्ने, यसका प्रक्रियाहरू के–के हुन्, रिपोर्टिङ कसरी गर्ने आदि विषयमा विस्तृत जानकारी गराइएको थियो ।