नेपाल लाइफको नाफामा वृद्धि

काठमाडौं । नेपाल लाइफ इन्स्योरेन्सले चालू आर्थिक वर्षको तेस्रो त्रैमासको अपरिष्कृत वित्तीय विवरण प्रकाशित गरेको छ । यो अवधिमा इन्स्योरेन्सले खुद बीमाशुल्क गत आर्थिक वर्षको तेस्रो त्रैमासको तुलनामा सामान्य बढेको छ । इन्स्योरेन्सको खुद बीमाशुल्क तीन दशमलव २४ प्रतिशितले बढेको छ । चैत मसान्तसम्म इन्स्योरेन्सले बीमाशुल्कबापत २६ अर्ब ८३ करोड रुपैयाँ संकलन गरेको छ । गत आर्थिक वर्षको सोही अवधिमा इन्स्योरेन्सले २५ अर्ब ९९ करोड रुपैयाँ बीमाशुल्क आर्जन गरेको थियो ।

गत आर्थिक वर्षको तेस्रो त्रैमासमा १९ करोड ४५ लाख रुपैयाँ ऋणात्मक रहेको इन्स्योरेन्सको खुद नाफा चालू आर्थिक वर्षको सोही अवधिमा ४४ करोड ६५ लाख रुपैयाँ पुगेको छ । इन्स्योरेन्स नाफामा गएपछि इन्नस्योरेन्सको प्रतिसेयर आम्दानी सात रुपैयाँ २५ पैसा कायम भएको छ । गत आर्थिक वर्षको सोही अवधिमा एक खर्ब ३१ अर्ब १६ करोड रुपैयाँ रहेको जीवन बीमा कोष अहिले १९ दशमलव ८३ प्रतिशतले बढेर एक खर्ब ५७ अर्ब १६ करोड रुपैयाँ पुगेको छ । महाविपत्ति कोषमा ८३ करोड रुपैयाँ रहेको छ जुन गत आर्थिक वर्षको सोही अवधिमा तुलनामा १५ दशमलव ४९ प्रतिशतले बढी हो । कम्पनीको लगानी २० दशमलव शून्य सात प्रतिशतले बढेको छ । चैत मसान्तसम्म कम्पनीले एक खर्ब ६२ अर्ब २८ करोड रुपैयाँ लगानी गरेको छ ।

प्रकाशित विवरणअनुसार कम्पनीको भुक्तानी हुन बाँकी दाबी घटेको छ । गत आर्थिक वर्षको सोही अवधिमा करिव एक अर्ब २८ करोड रुपैयाँ दाबी भुक्तानी हुन बाँकी रहेकामा यस आर्थिक वर्षको चैत अन्तिमसम्म ३४ दशमलव १९ प्रतिशतले घटेर ८४ करोड रुपैयाँमा झरेको छ । आठ अर्ब २० करोड रुपैयाँ रहेको कम्पनीको प्रतिसेयर नेटवर्थ एक सय १६ रुपैयाँँ एक पैसा, मूल्य आम्दानी अनुपात ९३ दशमलव १९ गुणा, प्रतिसेयर कुल सम्पत्तिको मूल्य दुई हजार ९० रुपैयाँ र औसत प्रतिफल दर १० दशमलव ८४ प्रतिशत रहेको छ ।