ईयू मुलुकले गरे क्रिप्टो नियमको अनुमोदन

बेल्जियम । युरोपियन युनियनमा आबद्ध राज्यहरूले मंगलबार क्रिप्टो एसेट्सलाई नियमन गर्न विश्वको पहिलो बृहद् नियमलाई स्वीकृत गरेका छन् । यो नियम स्वीकृत गर्नुको मुख्य कारण बेलायत र संयुक्त राज्य अमेरिकाजस्ता देशहरूलाई दबाब दिनु रहेको बताइएको छ । बेल्जियमको ब्रसेल्समा भएको युरोपियन युनियनमा आबद्ध मुलुकका वित्त मन्त्रीहरूको बैठकले गत अप्रिलमा युरोपेली संसद्ले स्वीकृत गरेको नियमहरूलाई अनुमोदन गरेको हो ।

क्रिप्टो एक्सचेन्ज एफटिएक्सको पतनपछि युरोपमा क्रिप्टो नियमनको आवश्यकता महसुस गरिएको थियो । स्वीडेनका अर्थमन्त्री एलिजाबेथ स्वान्टेसनले भनिन् ‘पछिल्ला घटनाहरूले यस्ता सम्पत्तिमा लगानी गरेका युरोपेलीहरूलाई अझ राम्रोसँग सुरक्षा गर्ने र सम्पत्ति शुद्धीकरण तथा आतंकवादको वित्त पोषणको उद्देश्यका लागि क्रिप्टो उद्योगको दुरुपयोग रोक्न यो नियम तत्काल लागू गर्नुपर्ने आवश्यकता छ ।’

युरोपियन युनियनभित्रका २७ देशमा रहेका क्रिप्टो एसेट्स, टोकनाइज्ड, स्टेबलक्वाइन जारी गरी कारोबार गर्न कम्पनीहरूलाई यो नियमले सुरक्षित बनाइदिएको छ ।

युरोपमा रहेका क्रिप्टो कम्पनीहरूले कारोबारको नियमनमा निश्चितता चाहिएको र अन्य देशहरूलाई पनि युरोपियन युनियनले अवलम्वन गरेका नियमहरू प्रतिलिपि गर्न दबाब दिँदै आएका छन् । उनीहरूले क्रिप्टो कारोबारमा क्रस–बोर्डर गतिविधिको लागि नियामकहरूलाई विश्वव्यापी मापदण्ड ल्याउन चाहेका छन् ।