सनराइज बैंकद्वारा तीन थान प्रोजेक्टर हस्तान्तरण

काठमाडौं । सनराइज बैंक लिमिटेडले संस्थागत सामाजिक उत्तरदायित्वअन्तर्गत धनगढीमा तीन थान प्रोजेक्टर हस्तान्तरण गरेको छ । धनगढी उपमहानगरपालिका वडा नं ५ को हसनपुरको ऐश्वर्य विद्या निकेतनमा प्रभावकारी शिक्षा सञ्चालनका लागि प्रोजेक्टर हस्तान्तरण गरेको बैंकले जनाएको छ ।

मंगलबार आयोजित एक कार्यक्रमकाबीच बैंकका नायब महाप्रबन्धक रवीनकुमार नेपालले विद्यालयका प्रधानाध्यापक प्रेमनिधि ओझालाई सामाग्री हस्तान्तरण गरेका हुन् । सो कार्यक्रममा प्रधानाध्यापक ओझाले विद्यार्थीलाई प्रविधिमैत्री शिक्षा प्रदान गर्नका यी सामग्रीले सहयोग गर्ने भन्दै बैंकलाई धन्यवाद ज्ञापन गरे ।

३० थान डस्टबिन सहयोग
यसैबीच, बैंकले धनगढी उपमहानगरपालिकालाई ३० थान डस्टबिन सहयोग गरेको छ । नायव महाप्रबन्धक नेपालले उपमहानगरपालिकाका मेयर गोपाल हमाललाई ३० थान डस्टबिन हस्तान्तरण गरेका हुन् । सर्वसाधारणलाई फोहर व्यवस्थित ठाउँमा फाल्न प्रोत्साहन गर्ने उद्देश्यले उक्त डस्टबिन सहयोग गरेको नेपालले जानकारी दिए । यी डस्टबिन अब चोक र सडक किनारामा राख्ने तयारी गरिएको छ ।

डस्टबिन हस्तान्तरण कार्यक्रममा मेयर गोपाल हमालले बैंकको यो सहयोगले स्मार्ट धनगढी बनाउने परियोजनामा टेवा पु-याउने भन्दै बैंकलाई धन्यवाद ज्ञापन गरे । बैंकले धनगढी त्रि–नगर विद्यालयमा विद्यार्थीहरूलाई आफ्ना साइकल सुरक्षित रुपमा राख्न सहज होस् भनी एक सय वटा क्षमताको साइकल स्ट्यान्ड समेत बनाएको छ ।