भ्याकेन्सीबारे झूटो सूचना नपत्याउन टेलिकमको आग्रह

काठमाडौं । नेपाल टेलिकमले कर्मचारी माग नगरेको स्पष्ट पारेको छ । टेलिकममा नयाँ कर्मचारी माग गरिएको भ्रमपूर्ण सूचना फैलिएपछि टेलिकमले बुधबार विज्ञप्ति जारी गर्दै गलत सूचनाको पछि नलाग्न आग्रह गरेको हो ।

कर्मचारी आवश्यकतासम्बन्धी सूचना कम्पनीले राष्ट्रिय दैनिक गोरखापत्र तथा कम्पनीको वेबसाइटमा मात्र आधिकारिक रूपमा सार्वजनिक गर्ने गरेको जनाएको छ । गलत सूचनाको भ्रममा नपरी आधिकारिक माध्यमबाट सम्प्रेषित सूचनालाई मात्र ग्रहण गर्न पनि कम्पनीले आग्रह गरेको छ । केही दिनयता ‘नेपाल टेलिकमका विभिन्न शाखाहरूमा काम गर्न भ्याकेन्सी खोलिएको’ भनेर कम्पनीका पदाधिकारीहरूको नामसमेत जोडी विभिन्न फेसबुक ग्रुप र म्यासेन्जर तथा ह्वाट्सएपलगायतका सामाजिक सञ्जालमार्फत गलत सूचना प्रवाह भएको सम्बन्धमा कम्पनीको गम्भीर ध्यानाकर्षण भएको उल्लेख गरेको छ ।