प्रदेशसभा बैठकमा मधेस प्रदेश सरकारको नीति तथा कार्यक्रम प्रस्तुत हुँदै

जनकपुरधाम । आगामी आर्थिक वर्ष २०८०/८१ को मधेश प्रदेश सरकारको नीति तथा कार्यक्रम मंगलबार प्रस्तुत हुने भएको छ । मंगलबार दिउँसो ३ बजे बस्ने प्रदेशसभा बैठकमा प्रदेश प्रमुख हरिशङ्कर मिश्रले नीति तथा कार्यक्रम प्रस्तुत गर्ने कार्यसूची रहेको प्रदेशसभा सचिवालयका सचिव रञ्जितकुमार यादवले जानकारी दिए ।

पहिलो पटक मुख्यमन्त्री सरोजकुमार यादव नेतृत्वको सरकारले आफ्नोे नीति तथा कार्यक्रम प्रस्तुत गर्दैछ । आगामी आर्थिक वर्षको बजेट प्रदेश सरकारले दीगो, फराकिलो एवं समावेशी आर्थिक वृद्धि हासिल गर्ने, सेवा प्रवाहमा सुधार र स्रोतसाधनको परिचालनमा प्रभावकारिता कायम गर्नेतर्फ लक्षित हुने यसअघि प्रस्तुत गरिएको विनियोजन विधेयक, २०८० का सिद्धान्त र प्राथमिकतामा उल्लेख गरेको छ ।

गत वर्ष पुस २९ गते मुख्यमन्त्री यादव नेतृत्वको सरकार गठन भएको थियो भने सरकारमा जनता समाजवादी पार्टी (जसपा)सहित नेपाली कांग्रेस, नेकपा (माओवादी केन्द्र), जनमत पार्टी, नेकपा (एकीकृत समाजवादी) र लोकतान्त्रिक समाजवादी पार्टी (लोसपा) सहभागी छन् ।