साउदी अरेबियाले तेलको उत्पादन घटायो

साउदी अरेविया । साउदी अरेबियाले आइतबारदेखि तेल उत्पादन कटौती गरेको छ । साउदीले प्रतिदिन करिब १० लाख ब्यारेल कच्चा तेल उत्पादन कटौती गरेको छ । यो कटौती जुलाई महिनाभर हुने बताइएको छ । जुन विश्वव्यापी आपूर्तिको करिब एक प्रतिशत हो । यही कारण सोमबार विश्व बजारमा कच्चा तेलको मूल्य बढेको छ ।

सोमबार साँझसम्म ब्रेन्ट आयल बेन्चमार्क दुई प्रतिशत भन्दा बढीले बढेर ७८ डलर प्रतिब्यारेल पुगेको छ । ऊर्जा विश्लेषकहरुले साउदी अरेबियाले गरेको यो कटौती पेट्रोलियम निर्यात गर्ने देशहरुको संगठन (ओपेक) र सहयोगीहरुले गरेको सन २०२४ सम्म आपूर्ति सीमित गर्ने सम्झौताभन्दा बाहिर रहेको बताएका छन् ।

अन्तर्राष्ट्रिय बजारमा कच्चा तेलको मूल्य ओरालो लागेपछि साउदी अरेबियाले उत्पादनन कटौतीको निर्णय गरेको जनाएको छ । एनर्जी इनर्जी इन्टेलका प्रमुख ओपेक संवाददाता अमेना बकरले कच्चा तेलको मूल्य अझै प्रतिब्यारेल दुई–तीन डलर कम रहेको बताइन् । उनले खाडी राज्यले आफ्नो बजेट सन्तुलन गर्न आवश्यक पर्ने तेलको मूल्य ८१ डलर प्रतिब्यारेल हुने बताइन् ।