रसौलीमा एक्साभेटर दुर्घटनामा एकको मृत्यु

तनहुँ । आइतबार आबुखैरेनी गाउँपालिका–५ रसौलीमा एक्साभेटर दुर्घटना हुँदा सहचालकको मृत्यु भएको छ । अन्दाजी २५ वर्षका सल्यान स्थायी घर भएका खेमराज चलाउनेको सो दुर्घटनामा मृत्यु भएको हो ।

आबुखैरेनी–२ मार्किचोकबाट भरतपुर चितवनका लागि दुई सय २० केभी हाइटेन्सनको टावर निर्माणका लागि जाने कच्ची सडक बनाउने क्रममा दुर्घटना भएको प्रहरी नायब उपरीक्षक मोहनबहादुर खाणले जानकारी दिए ।

एक्साभेटर चालक चितवन स्थायी घर भएका सुन्दर श्रेष्ठ हालसम्म फरार रहेकाले निजको खोजतलास भइरहेको प्रहरीले जनाएको छ । आबुखैरेनी–५ रसौलीबाट ग ३ क ३९७४ नम्बरको एक्साभेटर अन्दाजी एक हजार पाँच सय मिटर तल खोंचमा खस्दा उक्त दुर्घटना भएको हो ।