सानिमा जीआईसी इन्स्योरेन्सको पाँचौँ वार्षिक साधारणसभा

काठमाडौं । सानिमा जीआईसी इन्स्योरेन्स लिमिटेडको पाँचौँ वार्षिक साधारणसभा सम्पन्न भएको छ । कम्पनीका अध्यक्ष कुनाल कयालको अध्यक्षतामा बिहीबार अमृतभोग, कालिकास्थान, काठमाडौंमा कम्पनीले वार्षिक साधारणसभा सम्पन्न गरेको हो ।

सभामा आव २०७८/०७९ को वार्षिक प्रतिवेदन प्रस्तुत गर्दै अध्यक्ष कयालले नेपाल वित्तीय प्रतिवेदनमान (एनएफआरएस)बमोजिमको वित्तीय विवरण पेस गरेका थिए । सभाले सो प्रस्ताव सर्वसम्मतरूपमा पारित गरेको छ । त्यस्तै, आगामी आव २०७९/०८० का लागि कम्पनीको वार्षिक लेखा परीक्षकमा श्री एन अमात्य एन्ड कम्पनी, चार्टर्ड एकाउन्टेन्ट्सलाई नियुक्त गर्न सञ्चालक समितिको प्रस्ताव सभाले सर्वसम्मतरूपमा पारित गरेको छ ।

सभाबाट कम्पनीका संस्थापक सेयरधनीहरूको तर्फबाट सञ्चालक समितिमा प्रतिनिधित्व गर्ने तीन जना सञ्चालकहरूमा क्रमशः कुनाल कयाल, दिलीप श्रेष्ठ र मिता मुरारका अग्रवाल निर्विरोध निर्वाचित हुनुका साथै सर्वसाधारण सेयरधनीहरूको तर्फबाट सञ्चालक समितिमा प्रतिनिधित्व गर्ने तीन जना सञ्चालकहरूमा क्रमशः डा हेमन्तकुमार दवाडी, प्रकाशमान श्रेष्ठ र सरस्वती गौतम (ज्ञवाली) निर्विरोध निर्वाचित भएका छन् । साथै, कम्पनीले आफ्नो ध्यान अझ उत्कृष्ट सेवा दिनमा केन्द्रित गरी ग्राहकहरूको मन जित्दै आफ्नो व्यवसाय थप विस्तार गरी देशको अर्थतन्त्रमा महत्वपूर्ण भूमिका निर्वाह गर्न क्रियाशील रहने प्रतिबद्धता
व्यक्त गरेको छ ।