प्रसङ्ग : छात्रवृत्तिको विवरण अनि काठमाडौं महानगरपालिका

काठमाडौं । कुनै पनि स्कुलले वर्षभरमा विद्यार्थीलाई कति छात्रवृति दिने रहेछ ? कति महिनाको दिने रहेछ ? कसैले ११ महिनाको दिन्छन् होला, कसैले १२ महिनाको दिन्छन् होला । कसैले महिना फिबाट÷अनि कसैले ट्युसन फिबाट २५ देखि शतप्रतिशतसम्म पनि दिन्छन् होला । विद्यार्थीबाट स्कुलले विभिन्न शीर्षकमा शुल्क उठाउन सक्ने व्यवस्था छ । जस्तो मासिक शुल्क, अतिरिक्त कक्षा शुल्क, खाजा, प्राविधिक प्रयोश शुल्क इत्यादि । समयअनुसार विभिन्न शीर्षकमा महँगी फि बढेको पनि देखाउने रहेछ । रोचक कुरा त के रहेछ भने, यो अतिरिक्त कक्षा शुल्क (वर्गीकरण गरिएको शीर्षक जुन अरू शुल्कभन्दा न्यून)बाट नै छात्रवृत्ति दिने स्कुलको आफ्नै नियम देख्दा पो चुट्किला हिजो सुनेको आज हासो लागेजस्तो भयो । जबकि स्कुलले अरू शीर्षकमार्फत एकमुष्ठ शुल्क उठाएका हुन्छन् ।

सरसर्ती हिसाब गर्दा कुनै विद्यार्थीले छात्रवृत्ति पाइहाले पनि यतिसम्म हुने रहेछ कि एउटा विद्यार्थीबाट विद्यालयले पाउने रकमको ५ देखि सात प्रतिशत हुन आउने रहेछ । विद्यार्थीलाई ललिपप खान दिएको जस्तो गरे त स्कुलले ! ल फेरि अर्को नियम यस्तो नि हुने रहेछ, उठाउन त १२ नै महिनाको फि उठाउँछन्् विद्यार्थीबाट । तर पाउँछन ११ महिनाको मात्र छात्रवृत्ति रे । यस्तो छ स्कुलको भाषा । १०० प्रतिशतमा शत प्रतिशत नै दिनेलाई चाहिँ कुन शब्द प्रयोग गर्छन् होला स्कुलले ? झट्ट हेर्दा विद्यार्थीले छात्रवृत्ति त पाइहालेका छन् तर केलाउँदा पो अभिभावक सिधै ठगिएजस्तो देखियो । आखिर कसले केलाएका रहेछन् र ? तैचुप मैचुप स्याम्सुम् । हुटहुटी बोकेका उदाउँदो युवा मेयर बालेनसँग अब भने गुनासोको चाङ आएको छ । पारदर्शिता कायम नगरेको र झाराटारी मात्रै भएको महानगरको भनाइप्रति मेरो पनि एक मत छ । योबारेमा छड्के आउनु जरुरी छ । मलाई लाग्छ, छात्रवृत्तिसँगै कति छुट पाए त विद्यार्थीले? रकमसहित उल्लेख हुनु जरुरी छ । काठमाडौं महानगरपालिकाले यो बारेमा प्रत्येक स्कुलबाट छात्रवृत्ति पाउने विद्यार्थीको अभिभावकसँग समन्वय गर्दा छानबिन गर्न सजिलो हुने थियो कि ।