सामसङको इन्स्टा फाइनान्स सुरु

काठमाडौं । सामसङले आफ्ना उपभोक्ताका लागि शून्य प्रतिशत ब्याजदर रहेको वित्तीय सुविधायुक्त नयाँ सुलभ कार्यक्रम ‘इन्स्टा फाइनान्स’ प्रारम्भ गरेको छ । यो योजना २५ हजार रुपैयाँभन्दा बढी पर्ने सामसङ स्मार्ट फोन खरिद गर्ने ग्राहकका लागि लागू भएको कम्पनीले जनाएको छ ।

सामसङ नेपालले हुलास फिन सर्भ (एचएफएल)सँगको सहकार्यमा इन्स्टा फाइनान्स सुविधालाई प्रस्तुत गरेको हो । सामसङ इन्स्टा फाइनान्स एक झन्झटरहित, तत्काल फाइनान्स सुविधा उपलब्ध हुने सहज उपाय हो । जसको मासिक किस्ताको ब्याजदर शून्य रहेको छ । सामसङ नेपालका निर्देशक प्रणय रत्न स्थापितले ग्राहकको आवश्यकता र जरुरतलाई बुझ्दै कम्पनीका उत्कृष्ट उत्पादन र सेवाहरू उपलब्ध गराउन इन्स्टा फाइनान्स सुविद्या ल्याएको बताए । शुरुमा सामसङले नेपालका सम्पूर्ण प्रमुख बजारका दुई सयभन्दा धेरै सोरुममा यो सुविधा उपलब्ध गराउनेछ । यो योजनालाई अर्को महिनासम्ममा आफ्नो नेटवर्कमार्फत् बढाउँदै लैजाने योजना सामसङको रहेको छ ।

यो अत्यन्त सरल, झन्झटरहित र तुरुन्तै हुने प्रक्रिया हो । यसको लागि क्रेडिट कार्डको समेत जरुरत पर्दैन । ग्राहकले केही सामान्य प्रक्रिया पूरा गरेपछि तत्काल कर्जा प्राप्त गर्न सक्छन् । ग्राहकहरूले आवश्यक कागजातहरू (आवेदकको नागरिकता प्रमाणपत्र, र फोटो, ग्यारेन्टर बस्नेको नागरिकता प्रमाणपत्र र फोटो तथा आवेदकको आयस्रोत खुलेको पत्र)सहित इन्स्टा फाइनान्सको सेवा प्रदान गरिरहेको स्टोरमा जानुपर्नेछ । यसरी उपलब्ध गराइएका कागजाताहरू प्रमाणीकरण भएपछि ग्राहकले कानुनी कागजातहमा हस्ताक्षर गर्नुपर्नेछ । त्यसपश्चात् चाहेको स्मार्टफोन प्राप्त गर्न सकिनेछ ।