‘भूमिसम्बन्धी सबै काम क्रमबद्ध’

काठमाडौं । भूमि व्यवस्था, सहकारी तथा गरिबी निवारणमन्त्री रञ्जिता श्रेष्ठ चौधरीले मुलुकभरका सुकुम्बासीहरूको व्यवस्थापनको काम क्रमबद्ध रूपमा भइरहेको बताएकी छन् । मंगलबार प्रतिनिधि सभाको बैठकमा विनियोजन विधेयक २०८० अन्तर्गत सांसदले उठाएका प्रश्नहरूको जवाफ दिँदै उनले भूमिहीन दलित, सुकुम्बासी, अव्यवस्थित बसोबासीको व्यवस्थापन गर्न राष्ट्रिय भूमि आयोगबाट कार्य भइरहेको जानकारी दिइन् ।

यस्तै, कमैया, कमलरीलगायतका विषयको सम्बोधनका लागि कार्यविधि तयार गरी स्थानीय तहमार्फत कामअगाडि बढाइने बताइन् । यस कार्यलाई सबै प्रदेश सरकारसँग समेत समन्वय गर्ने उनको भनाइ छ । यस्तै, मन्त्री चौधरीले जग्गा किनबेचमा रोक नलगाएको बताइन् । सांसद बलराम भण्डारीले सरकारले जग्गा किनबेचमा किन रोक लगाएको भनी उनलाई प्रश्न गरेका थिए । भूमिको दिगो विकास र उपयुक्त व्यवस्थापनका लागि भू–उपयोग नियमावली जारी भएको र त्यसको संसोधनको तयारी भइरहेको समेत उनले जानकारी दिइन् ।

बैठकमा सांसदहरूले सहकारीमा देखिएको विकृति र यसको समाधानमा सरकारका ठोस योजना ल्याएर कार्यान्वयन गर्न नसकेको भन्दै प्रश्न गरेका थिए । जवाफमा भूमिमन्त्री चौधरीले सहकारी विभागमार्फत कार्ययोजना तयार गरी आफ्नो कार्य क्षेत्रभित्र पर्ने सहकारीहरूको अनुगमन र निरीक्षण गर्ने कार्य भइरहेकाले समाधानको प्रयास भइरहेको बताइन् । सबै सहकारीलाई अनुगमन तथा निरीक्षण भइरहेको उनको भनाइ थियो । समस्याग्रस्त सहकारीको उचित व्यवस्थापनका लागि समस्याग्रस्त सहकारी व्यवस्थापन समितिको कार्यालय गठन भई काम भइरहेको समेत उनले जानकारी दिइन् । यस्तै, राष्ट्रिय योजना आयोगका सदस्यको संयोजकत्वमा सहकारी समस्या समाधान कार्यदल गठन भएको र उक्त कार्यदलको प्रतिवेदन प्राप्त भएपछि कार्यदलको सुझावबमोजिम थप कार्यहरू गर्ने बताइन् । सांसदहरूले मुलुकको सीमा क्षेत्र र सीमाङ्कनसम्बन्धमा उठाएका प्रश्नको जवाफमा भूमिमन्त्री श्रेष्ठले परराष्ट्र मन्त्रालयमार्फत कूटनीतिक पहल भइरहेको जानकारी दिइन् ।