चेतनशील क्षमता सहकारीको साधारणसभा

दोलखा ।
दोलखाको बैतेश्वर गाउँपालिका– ६ नाम्दुमा रहेको चेतनशील क्षमता बचत तथा ऋण सहकारी संस्थाले २५औँ वार्षिक साधारणसभा सम्पन्न गरेको छ । सहकारीले २५औँ वर्षमा आइपुग्दा छ करोड ७२ लाख ८२ हजार पाँच सय १७ रूपैयाँ कुल पुँजी जम्मा गर्न सफल भएको छ । चेतनशील क्षमता बचत तथा ऋण सहकारीको सेयर पुँजी ६४ लाख ५२ हजार आठ सय रूपैयाँ र नाफा ३० लाखको रहेको संस्थाका कोषाअध्यक्ष बलराम घिमिरे प्रस्तुत गरेको आर्थिक वर्ष २०७६/०७७ आर्थिक प्रतिवेदनमा उल्लेख गरिएको छ ।

संस्थाले नाम्दु दाहालटारमा रहेको क्षमता अभिवृद्धि बचत तथा ऋण सहकारी संस्थासँग एकीकरण समेत गरेको छ । यस सहकारीको सेयरधनी हाल एक हजार सात सय ६७ जना रहेका छन् । संस्थाका अध्यक्ष पुन्यप्रसाद घिमिरेको अध्यक्षतामा सम्पन्न साधारणसभामा लेखा समितिको प्रतिवेदन संस्थाका लेखा संयोजक रामशरण घिमिरेले प्रस्तुत गरेका थिए । बैतेश्वर गाउँपालिका उपाध्यक्ष रबिचन्द्र आचार्यको प्रमुख आतिथ्यतमा भएको साधारणसभामा सहकारीले कोरोना भाइरसको जोखिमलाई मध्यनजर गर्दै जिल्लाका चारवटा सामुदायिक रेडियोहरूबाट कार्यक्रमको प्रत्यक्ष प्रसारण गरेको थियो ।