आर्थिक मुद्दालाई पहिलो प्राथमिकतामा राख्न आग्रह

काठमाडौं । नेपाल उद्योग परिसंघले आर्थिक मुद्दालाई पहिलो प्राथमिकतामा राख्न राजनीतिक दलहरूसँग आग्रह गरेका छन् । परिसंघको नवनिर्वाचित पदाधिकारीहरूले नेपाली कांग्रेसका सभापति एवं पूर्वप्रधानमन्त्री शेरबहादुर देउवालाई भेटी यस्तो आग्रह गरेका हुन् । उनीहरूले वर्तमान अर्थतन्त्रका विषयमा जानकारी गराउँदै राजनीतिक दलहरूले आर्थिक मुद्दालाई पहिलो प्राथमिकतामा राख्नुपर्नेमा जोड दिएका हुन् ।

परिसंघका अध्यक्ष राजेशकुमार अग्रवालले अर्थतन्त्र सुधारका लागि आर्थिक विषयहरूलाई प्राथमिकतामा राखेर निकास दिनुपर्ने बताए । आगामी आर्थिक वर्षमा छ प्रतिशतको आर्थिक वृद्धि हासिल गर्ने लक्ष्य प्राप्तिका लागि आगामी मौद्रिक नीति लचिलो हुनुपर्नेमा अध्यक्ष अग्रवालले जोड दिए ।

सो अवसरमा सभापति देउवाले अर्थतन्त्रको सुधार तथा निजी क्षेत्रको विकासलाई प्राथमिकतामा राख्दै आएको उल्लेख गरे । उक्त भेटमा उपाध्यक्षहरू वीरेन्द्रराज पाण्डे, अमित मोर, भीम घिमिरे, पदाधिकारी समितिका स्थायी आमन्त्रित सदस्यहरू छाया शर्मा, गोकुल भण्डारी, महानिर्देशक दीपकराज जोशी सहभागी थिए ।