पर्यटक सवारीका चालक र सहचालकलाई तालिम

काठमाडौं । पर्यटक सवारीका चालक तथा सहचालकको लागि तीन दिवसीय क्षमता अभिवृद्धि तालिम दिइएको छ । नेपाल पर्यटन बोर्ड र संयुक्त राष्ट्र संघीय विकास कार्यक्रम युएनडीपीको संयुक्त पहलमा परियोजना जीविकोपार्जनको पुनरुत्थानका लागि दिगो पर्यटन परियोजना (एसटीएलआरपी) को सहयोग तथा नेपाल पर्यटन यातायात व्यवसायी संघको (एनटीभीए)सँगको सहकार्यमा तालिम दिइएको हो ।

दुई सय ५० जना प्रशिक्षार्थीको सहभागिता रहेको तालिममा सैद्धान्तिक र व्यावहारिक विषयवस्तुको संयोजनसहित यातायात सुरक्षा, जोखिम, ट्राफिक ज्ञान, पर्यटन व्यवहारलगायतका विषयमा प्रशिक्षण दिइएको थियो । पर्यटनमा यातायात क्षेत्र पर्यटकसँग प्रत्यक्ष सरोकार राख्ने क्षेत्र भएको, चालक तथा सहचालकको व्यवहार हेरेर पनि पर्यटकले देशप्रतिको दृष्टिकोण बनाउने हुनाले उनीहरूलाई प्रशिक्षित गर्न आवश्यक रहेको पर्यटन बोर्डका निर्देशक तथा परियोजनाका राष्ट्रिय कार्यक्रम संयोजक मणिराज लामिछानेले जानकारी दिए । तीन दिनसम्म आयोजना गरिएको तालिममा हरेक दिन फरक–फरक समूहलाई प्रशिक्षण दिइएको जीविकोपार्जन विज्ञ धर्म दवाडीले बताए ।

नेपाल पर्यटक यातायात व्यवसायी संघका अध्यक्ष सन्तोष न्यौपानेले संघले समय–समयमा चालक सहचालकका लागि अभिमुखीकरण तालिम आयोजना गर्ने गरेको भए पनि अहिले एकैपटक यति ठूलो संख्यामा सहभागीलाई तालिम प्रदान गरिएको बताए । यस्तै, तालिमका सहभागी पर्यटक बसका चालक तथा सहचालकले समेत तालिम व्यावहारिक भएको र यसले आफूहरूमा कामप्रतिको जिम्मेवारीबोध बढाएको बताए । उनीहरूले तालिमबाट आफूहरूमा पर्यटन, पर्यटक, पर्यटकीय गतिविधिका साथै ट्राफिक ज्ञान अभिवृद्धि भएको बताए ।